کتابجاہ ءِ دزمان جنی ءُ تاکبند ءُ کتابانی برگپانی

کتابجاہ ءِ انوگیں دزمانجنی یا کہ دُزی ءَ پد بلوچ راج رنجیگ انت ءُ بازیں باسک ءُ دوزواہاں جست کتگ کہ کتابجاہ ءَ تاکبند ءُ کتابانی برگپانی یا کی پہریزگ ءَ پہ گام داں کجا سر کتگ۔ کتابجاہ اے درگت ءَ بلوچ راج ءِ فکرمندی پہ راجی مڈیاں سرپد انت ءُ اے گپ ھچ ورا شموشگ نہ بیت ءُ ستا کرز ات۔

کتابجاہ باسک ءُ دوزواہاں سرپد کنگ لوٹی کہ اے دزمانجنی دُزی بیتگ کہ کتابجاہ ءِ دریگ گوں آسن ءَ پروشگ ءَ پد کتابجاہ ءِ لہتے برگی ساماں گوں وت برتگ انت ءُ کتاب بُرز جہل کتگ انت، بلے گندگ بیت کہ لہتے مردماں وتی نیمگ ءَ چے بلوچ راج پریشان کرتگ کہ کتابجاہ ءَ ،باز تاوان داتگے اے گپ رَدَ انت ءُ کتابجاہ رَدّیں ءُ بے بُنیں گپانی شِنگ کنگ ءِ یک رَدّیں دود ءِ سرپد بیت۔ لہتے مردم بلوچ راج ءَ گیش پریشان کنگ ءِ آترا گیشیں گپ ھوار کرتگ ات چو کہ ھدا مہ کنت کتابجاہ آس دیگ بیتگ ءُ اے دگہ۔ کتابجاہ اے وڑیں دروگیں ھالانی شنگ کنوکاں تُرندی ءَ ایر جنت کہ بلوچ راج ءِ گیش پریشان کنگ ءِ یک جہد ءِ کہ وتی آسر ءَ سر نہ بیت، کتابجاہ ءَ یک دمانے اوں وتی کار نہ داشتگ ءُ وانوک چہ ھما روچ ءَ وانگ ءَ انت۔ ۔

دزمانجنی ءَ پد بازیں باسک ءُ دوزواہاں مئے گوں جُست گپتگ کہ برگپانی ءِ کار کجا سر بیتگ ءُ کتابجاہ چے کنگ ءَ انت۔ اے درگت ءَ کتابجاہ باسک ءُ دوزواہاں سئیگ کنت اے سک مزنیں جست ءِ کہ برگپانی ءِ کار کجا سر بیتگ۔ پہریزگ (بزاں اسکین کنگ) ءِ کار ءِ بندات 2013 ءَ بیتگ۔ پہریزگ ءَ پہ دوزاہ ءُ باسکانی مالی کمک ءَ گوں پہریزوک (اسکینر) زیرگ بیت ءُ پہریزگ ءِ کار بندات بیت چوش کہ بندات ءَ مستریں مڈّی بزاں کہ تاکبنداں (ماہتاک ءُ سالتاک یا کہ پانزدہ روچی ءُ اے دگہ تاکبند) چہ بندات زیرگ بیت، اے کار ءِ باروا نویسگ اے کار ءِ گرانی ءُ کار ءُ کار کنوکیں سنگتانی ازمت ءَ پدر کت نہ کنت بلے چوش انت کہ 1 تاک ءِ یک منٹ ءِ پہریزگ بیت ءُ آئی ءَ پہ یک کمپیوٹر ءِ یک کار کنوک ءَ ابید برک (لین) بیگ المہ انت پدا۔ وڑ ءُ مُچ کنگ، تاکبندانی پوشاں دیر کنگ ءُ پہریزگ ءَ پد پوش کنگ۔
وہدے اے کار کہ ما بندات کرتگ ات آ روچاں چیزے ورنا (کتابجاہ ءِ کمککاریں باسک) وتی وانگجاہانی موکلانی کُلیں روچ کتابجاہ ءِ گوازین انت، اے ماہانی جہد ءِ برکت ءَ کتابجاہ ءَ داں اے وہدی 80 درسد ماہتاک، نیم ماہی ءُ چیزے تاکبند پہریزتگ انت۔ اے وہد کشیں کار ءِ بازیں تَل (لیئر) انت چو کہ پہریزگ ءَ پد یک اشانی چار ءُ بچار کنگ ءُ مُجھ (بَلر) ءُ کور دیمیں تاک گیشینگ ءُ دوبر پہریزگی انت۔
کتابجاہ ءَ سال ءَ گیش انت کہ پہریزگ ءِ کار نہ بیتگ اشی سوب کار کنوکانی دزگٹی ءُ نوکیں کارکنوکانی ہمراہ داری نہ کنگ انت۔ اے گپ ءَ شما شر سرپد بئیت کہ بے کار کنوک ءَ ھچ وڑا کار دیما شُت نہ کنت ءُ کتابجاہ پہ زرّ اے کار ءَ کنگ ءِ آٹی نہ دار ات۔

مئے توار پہ سنگت ءُ دوزواہاں ھمیش انت کہ آ وتی گاماں پہ اے نیمگ ءَ شات بہ کناں کہ کتابجاہ کُلیں کتاب گوں پشت کپتیں تاکبنداں پہریزگ بہ باں۔
شمے منتوار