Home / News / بلوچی زبانءِ نامداریں گشندہ استاد عبدالستارءِ بیرانی ءِ دہمی سالروچءِ دیوان

بلوچی زبانءِ نامداریں گشندہ استاد عبدالستارءِ بیرانی ءِ دہمی سالروچءِ دیوان

پہ بلوچی زبانءِ دیمروی ء سید ھاشمی ریفرنس کتابجاہءِ ھزمت مُدام مان انت ، ڈاکٹر رمضان بامری
ما وتی ازم کار ءُ گشندہانی شرپ ء بہ زان ایں ءُ زندگیناں دست بہ گریں ، اصغرعلی آزگ

چہ سید ھاشمی ریفرنس کتابجاہءِ نیمگا بلوچی زبانءِ نامداریں گشندہ استاد عبدالستارءِ بیرانی ءِ دہمی سالروچ ءِ درگتء یک پر مڑاہیں دیوانے پنچ شمبے ۱۴ ،اپریل ۲۰۱۶م ء نبیل گبول ھال نوکیں لینء برجم دارگ بوت۔ دیوانءِ جارچین بلوچی زبانءِ نامداریں شاعر اسحاق خاموش ات۔ دیوانءِ دو بہر اتنت ، اولی استاد عبدالستارءِ زند ءُ ازم ءِ سرا گشتانکانی بہر ات ءُ دومی بہر سازءُ زیمل ئیگ ات۔ اولی بہر ء استاد عبدالستارءِ زندءُ ازم سرا چمشانک دیانء بلوچی زبانءِ نامداریں شاعر اصعر علی آزگ ء گْوشت کہ مئے راج وتی لبزانت ءُ ازم کاراں یات نہ کن انت بلکیں ھما مردماں یات کن انت کہ آیاں راجء نعرہ بازیء ابید دگہ ھچ نہ داتگ۔ آئیء گْوشت کہ بائد ما وتی ازم کارانی ارزشء بہ زان ایں ، ھما کہ مروچی اے دنیا ء نہ انت آیاں یات بہ کن ایں ءُ ھما کہ زندگ انت آیاں دست بہ گریں آئیء گْوشت کہ ما ھما مردمانی ناماں ھم شوہاز بہ کن ایں کہ آ مردماں بے جُوپّ ءُ لالچء لبزانک ءُ ازم ءِ دیمروی ء کار کتگ ءُ وتی جندآیاں دیما نہ آورتگ۔ وش نیوز ءِ کارمستر احمد اقبال ء تران کنانء گْوشت کہ استاد عبدالمجید گْوادری ءِ پربستگیں راجی سوت کہ استادعبدالستار ، شفیع ءُ دگہ سنگتاں جتگ آ بلوچ ءِ تاریخء نمیران انت ۔آئیء گْوشت کہ بلوچی زبانءِ اولی تامر ھمّل ءُ مہگنجءِ سوت ھم استاد عبدالستارء جتگ انت ، آئیء گْوشت کہ اگاں ما وتی ازم کارانی ارزش نہ زانت گڈا مئے جند نہ مانیت ۔ سید ھاشمی ریفرنس کتابجاہءِ کارمستر ڈاکٹر رمضان بامریء چہ درستاں پیش واحد کامریڈ ءُ آئیءِ سنگتانی منّت گپت گْوشت کہ سنگتانی جوڑ کتگیں کمیٹیءِ جہدانی برورد انت کہ مروچی استاد عبدالستارءِ دہمی سالروچ ء چہ دورءُ دراجء مردم آتکگ ءُ ادا ساڑی انت ۔ آئیء گْوشت کہ پہ بلوچی زبانءِ دیمروی ء سید ھاشمی ریفرنس کتابجاہءِ ھزمت مدام مان انت ، آئیء گْوشت کہ مروچی کراچیءِ دانشجاہ (یونیورسٹی)ءُ لیاری ءِ دانشجاہ ء کہ بلوچی زبان وانینگ بیگ انت اے سید ھاشمی ریفرنس کتابجاہءِ حیر ءُ برکت انت ۔
دیوانءِ اولی بہرءِ گڈسرا دیوانءِ دیما سے منّگ نامہ پیش کنگ بوت انت کہ چوش انت :
۱۔ سِند(سندھ) سرکار استاد عبدالستارءِ نامء یک انسٹیٹیوٹے جوڑ بہ کنت ءُ بلوچی سازءُ زیمل ءِ سرا کار بہ کنت۔
۲۔ سرکاری رسانک درءِ تہا بلوچی زبان ء آئیءِ پکاریں بہر دیگ بہ بیت ءُ بلوچی زبان رسانک درء شنگ کنگ بہ بیت۔
۳۔سِند(سندھ)سرکاربلوچ ازم کار، ندکار ءُ شاعرانی دلبڈی ءُ کمکء بہ کنت ءُ ھما ادارہ کہ بلوچی زبان ءُ لبزانکءِ دیمرویء کار کنگ انت آیانی مالی کمک بہ کنت۔
منّگ نامہاں پد دیوانءِ اولی بہر آسر بوت۔
دیوانءِ دومی بہر سازءُ زیمل ئیگ ات ۔ دیوان ءِ بنگیج چہ راجی سوت ء نبیل ،مراد ءُ عدیل ء کت۔ اے بہر ء بلوچی زبانءِ نامداریں گشندہاں وتی ازم درشان کت گشندہانی تہا استاد نورمحمد نورل، عارف بلوچ، رسول بخش پنجگوری،جمیل نور، مسلم ھمل ، عارف بلوچ ،شاہ جہان داؤدیءُ دگہ گشندہاں وتی ازم درشان کت۔ پرمڑاہیں دیوان شپءِ ساعت یک ء وتی آسرء رست۔ دیوانء چہ لیاری ، ملیر ، گولیمار ءُ دگہ بلوچ دمگانی پجّیا دورءُ دریں شہراں ھم مردمانی مزنیں کچّے ء بہر زرتگ ات۔

IMG_7470 IMG_7728 IMG_7515 IMG_7486