Home / News / شہید صبا دشتیاری ءِ شہادت ءِ پنچمی سالروچ ءِ دیوان

شہید صبا دشتیاری ءِ شہادت ءِ پنچمی سالروچ ءِ دیوان

شہید صبادشتیاریءِ جہد ھمے بوتگ کہ بلوچ وتا بلوچ ءِ جندءِ تہا شوہاز بہ کنت، ڈاکٹر رمضان بامری

شہید صبادشتیاریءِ لبزانکی سفر بید آئیءِ شاعری ء سرجم نہ بیت ، شرف شاد

چہ سید ھاشمی ریفرنس کتابجاہءِ نیمگا شمبے ، 4 جون 2016ء ماں پرنس گارڈن ملیر ء یک پرمڑاہیں دیوانے برجم دارگ بوت۔ دیوان ءِ جتا جتائیں بہربیتگ انت۔ اولی بہر گُشتانکی بہر ات کہ اے بہر ءَ پروفیسر صبادشتیاریءِ زندءُ ازم ءُ لبزانکی سفر سرا کوّاس ءُ زانتکاراں وتی مارشت پیش کتنت ۔ اولی بہرء دیوان ءِ پاگواجہی ءِ کرسی ءِ سرا شہید صبادشتیاریءِ عکس ایر کنگ بوتگت ءُ ڈاکٹر رمضان بامری چہ کتابجاہءِ نیمگا دومی پاگواجہ ات۔ اولی بہر ءِ ھلاسی ء پد چہ کتابجاہ ءِ نیمگا لبزانکی جہدانی مُز ء ’’صبادشتیاری شیلڈ‘‘ دیگ بوت۔ دومی بہر ء اسٹیج کسمانکے ’’تئو کئے‘‘ پیش کنگ بوتگ ءُ اے بہر ء پد بنگیجی ءُ سرٹیفیکٹ ءِ چکاساں سوبمند بوتگیں نودربراں مدرک ءُ سند دیگ بوتنت ءُ گڈسری بہرلچہی دیوان ات کہ نامداریں شاعراں وتی شعر ونت انت۔ دیوانءِ جارچین سلمان داد بلوچ ات ءُ شاعری دیوان حمّل پرویز ء دیگ بوت۔
دیوان ءِ بنگیج چہ پاکیں کلام ءِ تلاوت ء نوشاد صمد ء کت۔ ایشیء پد شہید صبادشتیاریءِ یاتء یک منٹے ءِ بیتواری کنگ بوت۔ گُشتانکی بہر ءِ گڈسرا تران کنانء ڈاکٹر رمضان بامری ء آیوکیں مردمانی منّت گپتءُ گْوشت کہ شہید صبادشتیاریءِ پگر ءُ لیکہ ھمے بوتگ کہ بلوچ وتا بلوچ ءِ جندءِ تہا شوہاز بہ کنت ۔آئیء گْوشت کہ بلوچ وتا ٹکّ ءُ تمنانی تہا شوہازگ انت ، مئے چاگرد ء ودّلیں واجہ ءُ میری باز انت بلے کِردءِ میری باز کم انت ۔ آئیء گْوشت کہ سید ھاشمی ریفرنس کتابجاہ بلوچ راجءِ مڈّی انت ءُ بلوچ راج ایشیء کمک کنانء دیما بران انت۔
بلوچ نبشتہ کار شرف شادء وتی گشتانکءِ تہا پروفیسر صبادشتیاری ءِ شاعریءِ تک ءُ پہنات ءِ سرا جْوانیں چمشانکے دیان ء گْوشت کہ شہید صبا دشتیاریءِ لبزانکی سفر ءِ پہنات سک پراہ ءُ شاہگان بوتگ ، لبزانک ءِ کجام ھم پڑ بہ بیت آئیءِ ھزمت گون انت ۔ آئیء گْوشت کہ شہید صبادشتیاریء زندءِ تہا بدلی آرگ ءِ شون داتگ ،آئیءِ لیکہ ھمے بوتگ کہ گہتریءِ واب گِندگ لوٹیت پرچا کہ واب بنی آدمءِ زندءِ رہشون انت۔ آئیء گْوشت کہ صبادشتیاری ءِ شاعری پگری شاعری بوتگ۔اقبال ھاشمی ء وتی گشتانکءِ تہا گْوشت کہ شہید صبادشتیاریءِ سے مزنیں درد بوتگ انت یکے بلوچی زبانءِ نزوری ءُ پدمنتگیء آسکّ پدرد ءُ کہتیگ ات کہ چاگردءِ زباناں بلوچی زبان انگر کتگ ءُ آئیءِ سرا اُروش کتگ ۔ آئیء گْوشت کہ دومی درد بلوچ ءِ جند ءِ پدمنتگی ءِ درد ات کہ آ گوں نگیگیں جاوراں دوچار اِنت۔ سیمی درد بلوچستان ءِ درد ات بلوچستانءِ مال ءُ مڈّیانی لُٹ پُل ءِ درد ات ، ورنایانی بیگواہی ءُ کوش ءِ درد ات۔ عارف میروانی ء وتی گشتانک ءِ تہا گْوشت کہ واجہ صبادشتیاری تچک گْوشیں مردمے بوتگ ، سکّیانی وہدء آئیء وتی ھمراہ نہ دروہتگنت، آئیء گْرانیں وہدانی دیم پہ دیمی زانتگ ۔ آ راستی ءِ منوگرے بوتگ ءُ آئیء بے تُرسء راستی ءِ پلہ مرزی کتگ۔ چندن ساچء پروفیسر صبادشتیاریءِ آزمانکءِ پڑءِ سرا تران کنانء گْوشت کہ ھما آزمانک یا گدار چاگردء گیشتر وانگ بیت کہ آ چاگردءِ تبءِ پدا بہ بیت۔ گشتانکی بہر ء پد دود ءِ پدا کہ چہ کتابجاہ ءِ نیمگا ھمک سال بلوچی زبانءِ ھزمتءِ مزء یک زانتکارے ء ’’پروفیسر صبادشتیاری مُزداد‘‘(پروفیسرصبادشتیاری ایوارڈ)دنت ۔ اے سالء کتابجاہ ء پہ مُزداد ء ڈاکٹر حمید بلوچ ءِ نام گچین کتگت ۔ ڈاکٹر حمید بلوچ وت دیوان ء آتک نہ بوتگ ات پمیشکا آئیءِ مُزداد نامداریں بلوچ دانشور ءُ زانتکار واجہ میر محمد علی ٹالپر ء چہ غلام رسول کلمتی ء دست گپت۔ اولی بہر ءِ ھلاسی ء پد یک اسٹیج کسمانکے ’’تئو کئے؟‘‘طارق مراد ءُ آئیءِ ٹولی ء پیش کت ۔ ایشیء پد داد دیوان بہر بوت کہ اے بہ رء سرٹیفیکٹ ءُ بنگیجی کلاسانی سوبمند بوتگیں نودربراں سندءُ مدرک دیگ بوتنت۔داد دیوان ءِ بہر ء غلام رسول کلمتی ء گْوشت کہ بلوچی کلاس ھما وڑا کہ پیسرا برجاہ بوتگنت آئیءِ تہا کمی آتکگ بیت کنت کہ ایشیءِ تہا ملکءِ جاورانی دست ھم ھوار انت بلے مستریں نزوری مئے وتیگ انت ۔اے بہر ء میر محمد علی ٹالپر ، واحد کامریڈ ، جمال عبدالناصر ،اکبر ولی ءُ سجاد علی ء سندءُ مدرک بہر ءُ بانک کتنت۔ بنگیجی کلاسءِ تلاہی تگمہ اولی باجاں(Position)آتکگیں نودربر ارشاد اقبال ء دیگ بوت۔ سرٹیفکٹءِ تلاہی تگمہ اولی باجاں (Position)ء آتکگیں زرگل غلام رسول ء ، دومی نگرہی تگمہ دومی باجاں آتکگیں پسنی ءِ دادبخش ء محمد ءُ سیمی گلٹی تگمہ سیمی باجاں آتکگیں پسنی ءِ نودر بر جہانگیر ء محمد انورء دیگ بوتگ۔مدرکءُ داداں پد دیوانءِ سیمی لچہی بہر بنگیج بوت کہ آئیءِ تہا پاگواجہ ظفر کریم ات ءُ گہیں مہمان واجہ احمد اقبال ءُ واجہ اسحاق خاموش اتنت۔ اے بہر ءِ جارچین حمّل پرویز ات۔ دیوان داں شپءِ دہ ءُ نیمء آسر بوت۔
دلگوش، پہ دیوان ءِ اکساں کتابجاہ ءِ فیسبُک تاک ءَ بچار ات