Home / News / ماتی زبانانی میاں استمانی روچ ءُ دو دانک

ماتی زبانانی میاں استمانی روچ ءُ دو دانک

ماتی زبانانی میاں استمانی روچ ءُ دو دانک

گْوشنت کہ ھرکسءَ وتی درد گْریوائینیت۔بلوچءَ بلوچی زبانءِ درد گْریوائینیت۔اے ھبرءِ تہا ھچ شک نیست مروچی بلوچی زبان ھم مہکمی ءِ نیمگا روان اِنت پرچاکہ بازیں ادارہ پہ بلوچی زبانءِ مہکمیءَ کار کنگا اَنت۔ھمے ادارہانی توکا یکے سید ھاشمی ریفرنس کتابجاہ اِنت۔

’’سید ھاشمی ریفرنس کتابجاہ ‘‘ ءِ بُن ھِشت ۲۱ دسمبر ۲۰۰۳ ءَ ایر کنگ بوتگ۔۱۳مارچ ۲۰۰۵ءَ کتابجاہ پہ وانگ ءَ پچ کنگ بوت۔ بلے اے ھبرءَ من بہ گیشیناں کہ پروفیسر صبادشتیاریءِ سروکی ءَ کہ آئیءِ پجّیا لالالعل بخش رند، رحیم بخش آزاد ، کامریڈ عبدالواحد دگہ سنگتاں کتابجاہءِ بُن ھِشت ایر کنگءَ پیسر وتی کار بنگیج کتگ۔ما نہ گْوشیں کہ ما آزمانءَ پدگ بستگ البت وتی وسءَُ واکءَ کتابجاہ ءَ پہ بلوچی زبانءِ دیمرویءَ کہ لہتیں کارکتگ ءَُ کنگا اِنت آ چوش اَنت۔

’’سید ھاشمی ریفرنس کتابجاہ‘‘ پہ بلوچی زبان ءِ دیمرویءَ ھمک سال کراچی ءِ پجیا بلوچستان ءِ دور ءَُ دراجیں دمگاں جتا جتائیں مراگش برجم دار ایت۔ دنیگا کراچی، گوادر ، تربت ، پنجگور ، آواران ، نوشکی ءَُ دگہ دمگاں بازیں دیوان ءَُ مراگش برجم دارگ بیتگ انت ۔ایشاں ابید کتابجاہ دگہ پڑاں وتی گاماں دیما بران انت کہ چوش انت :
ھمک سال بلوچی سرٹیفیکٹ کورس ءَُ بلوچی بنگیجی کورسءِ کلاس ءِ برجم دارگ بنت ۔ اے کلاس کراچی ءِ پجیا کوئٹہ ، گوادر ، پسنی تربت ، نوشکی ءَُ دگہ ھند ءَُ دمگاں برجم دارگ بنت ۔بے وسیلہیءَُ نگیگیں جاورانی تہا ھم ۲۶۲۵ نودربراں چہ اے کورساں نپ ءَُ سیت زُرتگ۔

کتابجاہ ھمک سال سرٹیفکٹ ءَُ بنگیجی کورساں سوبمند بوتگیں نودربرانی شرپ ءَ داد دیوان (کانوکیشن) برجم داریت ۔ مروچی کراچیءِ دانشجاہاں چوشکہ کراچی یونیورسٹی ءَُ شہید بے نظیر بھٹو یونیورسٹی لیاریءَ کہ بلوچی زبان وانینگ بیگ انت ۔بُندرا کتابجاہءِ کورسانی سکین اِنت ۔ایشانی پجّیاکہ بلوچستانءِ کسان کسانیں گل ھم وتی دمگاں ھمے کورساں وانینگ اَنت۔ما گْوشت کنیں کہ پہ ماتی زبانءِ دیمرویءَ ھما گامگیج کہ زورگ بوتگ انت مروچی منزلءِ نزیکءَ سربیتگیں۔
کتابجاہ ھمک سال یک ناں یک نامداریں شاعر ، نویس کار ،ازم کار یا کواسے ءِ نامءَ یاتگاریں شعری دیوانے برجم دار یت ۔ اے دیوانءَ شاعر یا نویسکار ءِ ھزمتانی مُز ءَ آئیءِ نام ءَ یک ایوارڈے ھم دیگ بیت ۔

ھمک دومی سالءَ لس دیوان برجم دار یت ءَُ روچ پہ روچ اے دیواناں ورنایانی کچّ گیش بیان اِنت ۔

ھمک دومی سالءَ گچین کاریانی آسرءَ سوبمند بوتگیں اگدہ دارانی سوگندی مراگش نامداریں شاعرےءِ نامءَ برجم دارگ بیت۔

کتابجاہ ءَ کراچیءِ پجیا بلوچستان ءِ دور ءَُ دراجیں شہر ءَُ دمگاں سیمینار ءَُ یاتگاری دیوان برجم داشگ۔

سید ھاشمی ریفرنس کتابجاہ ءَ دنیگت سی ءَُ پنچ کتاب چاپ کتگ کہ ایشانی تہا لبزانکی ءَُ پٹ پولی کتاب ھوار اَنت ءَُ لہتیں کتاب پہ چاپ ءَ جریدگ اَنت۔

کتابجاہءِ یک مزنیں کارے ایش اِنت کہ گْوستگیں شست ھپتاد سالاں بلوچی تاک ءَُ تاکبند کہ چاپ بوتگ اَنت،آیانی گیشتریں کچّ کتابجاہ ءَ دست کپیت ۔ ھمے سبب اِنت کہ بلوچستان ءِ دانشجاہ بہ بنت یا کراچی ءِ ۔ پٹ پول کار بلوچی زبان ءَُ دگہ بلوچی سرحالانی سرا آیانی موادانی رسگءِ مزنیں درءَُ وسیلہ سید ھاشمی ریفرنس کتابجاہ اِنت۔اگاںھمے چندے سالاں چاپ بوتگیں بلوچی زبانءِ پٹّ پولی کتاباں چارئے ، گیشتر کتابانی مواد چہ سید ھاشمی ریفرنس کتابجاہ ءَ زورگ بوتگ۔پدا ھمے تاک ءَُ تاکبندانی نود در سد برگی پہریز بزاں (ڈجیٹلائزیشن )کنگ بوتگ انت۔

’’سید ھاشمی ریفرنس کتابجاہ‘‘ ءِ دیروی شہہ کِردے ماں بلوچستان ءَ پرائیویٹ اسکولانی تہابلوچی زبان ءَ چہ بنگیجی (نرسری)کلاساں وانینگ انت ۔ اپریل ۲۰۱۰مءِ سالءَ ماں تربت کیچ ءَ پرائیویٹ اسکولانی پرنسپل ءَُ واھندانی دو روچی سیمینارے برجم دارگ بوت ۔ دیوان ءِ تہا فیصلہ کنگ بوت کہ آوتی اسکولاں چہ بنگیجی ءَ بگر داں ھشت کلاس ءَ بلوچی زبان ءَ وانین انت ۔ اے ردءَ ۲۰۱۰ ءِ سالءَ سے وانگی(Text)کتاب بنگیجی (نرسری)،بنداتی (کے جی)، اولی (بُک ون) ءَُ دومی کلاسانی وانگی جوڑ کنگ بوتگ انت ءَُ تربت، پنجگور، گوادر ءَُ حب ءِ پرائیویٹ اسکولاں وانینگ بنگیج کنگ بوتگ۔ھمے بنیادی کتاب ماں سویڈن (یورپ) ءَ بلوچی چکاں وانینگءِ اجازت ءَُ منظوری سوئیڈن گورنمنٹ ءَ ھم داتگ ۔ کتاب ھموداچاپ بنت ءَُ ماں اسکولاں وانینگ بنت ۔ البت مروچاں ماں جن59دی اسکولاں بلوچی وانینگ ءِ کار سُست رواجیءِ آماچ اِنت ، ایشیءِ یک سببے بلوچستانءِ نگیگیں جاور اَنت ءَُ دومی جندی اسکولانی وتی جندءِ تہی جنجال اَنت۔ پروفیسر صبادشتیاریءِ شہادتءَ پد راپتہءِ نزوری ھم ھمے سببانی تہا ھواراِنت۔

جنجال ءَُ نگیگی وتی جاگہءَ بلے اگاں کُلّیں تکءَُ پہناتاں چمشانک دئے گڈا اے ھبرءَ ھر کس منّیت کہ پہ بلوچی زبانءِ دیمروی ءَ سید ھاشمی ریفرنس کتابجاہءِ یک مزنیں کِردے۔
البت بلوچی زبان دنیگا لہتیں تہی اڑاں اڑِتگ۔ اے اڑچوشیں اڑ نہ اَنت کہ گیش ءَُ گیوار مہ بنت۔ لہتیں اڑتیکنیکی اڑ اَنت بزاں اگاں زبان ءِ زانتکار بہ نند اَنت اے اڑا ں گیشینت کننت۔کتابجاہءَ زبانءِ تکنیکی تکءَُ پہناتءِ سرا ھم کار کتگ کہ زوت آئیءَ ما کتابی دْروشم ءَ شمئے دیما کاریں بلے مستریں اڑ بلوچ ءِ ادارہانی تہا بے رہبندی اِنت ۔مئے گْورا اے اے رَدیں حیال ءَُ گمانءَ رُدوم زُرتگ کہ نامداریں ادیب دانشور چہ رہبندءَ آجو اَنت، مزنیں دانشور ادارہانی تہا ھرچے کننت آیاں کس مہ گْوشیت،سیاہ کننت شرّ ، زرّد کننت شرّ۔ ایوکا ورنا رہبندانی پابندیءَ بہ کن اَنت ۔من گْوشاں کہ ھماروچی کہ ما رہبندانی پابندی بِنا کت مئے کُلّیں اڑ گیشّ ءَُ گیواریءِ نیمگا روٗنت ’’من نہ کشتگ ھِلارنہ اِنت ‘‘ءِ جند پشت نہ کپیت ۔اے کُنّت،یک دومیءَ نہ سگّگ ، یک دومیءَ ایر جنگ اے کُلّ بے رہبندیءِ بنیاد اَنت ۔ اے وہدی بلوچی زبانءِ دیمرویءِ مستریں اڑبے رہبندی اِنت۔

راجے کہ داں رہبندانی پابند مہ بیت ،آ ھجبر دیمروی کت نہ کنت۔