Home / News / میان استمانی لبزانک ء ماں بلوچی رجانکاری یک جوانیں گامگیج یے، اکبر بارکزئی

میان استمانی لبزانک ء ماں بلوچی رجانکاری یک جوانیں گامگیج یے، اکبر بارکزئی

چہ ’’سید ھاشمی ریفرنس کتابجاہ ‘‘ءِ نیمگا بلوچی زبانءِ نامداریں راجی شاعر ،زبانزانت ءُ کوّاس واجہ اکبربارکزئی ءِ شرپء یک دیے ماں صدیق میتگ ملیر ء یک شمبے، ۱۰ جنوری ۲۰۱۶م ء برجم دارگ بوت۔ دیوانءِ دو بہر اتنت ۔ اولی بہر واجہ اکبربارکزئیءِ شرپء ،ءُ نوک ءُ دوبر چاپ بوتگیں کتابانی دیمدرائی اتءُ دومی بہر شاعری ءِ دیوان ات۔ اولی بہرءِ بنگیج چہ پاکیں کلامءِ تلاوتء کنگ بوت کہ تلاوت مہر تمپیء کت۔ بنگیجء اکبر ولی ء چہ دُور ءُ دراجء آتکگیں مہمان وش آتک کت انت ۔ایشیء پد کتابجاہ ءِ کارگشاد غلام رسول بلوچ ء کتابجاہءِ سرجمیں سال ءِ کارءُ کردانی سرا یک گْونڈیں چمشانکءِ پجّیا واجہ اکبر بارکزئیءِ زندءُ ازمءِ سرا وتی مارشت درشان کت انت ۔ عزیز کلمتی ء چہ سِندی زبانء رجانک کتگیں وتی آزمانکانی کتاب’’سندھی آزمانک‘‘ءُ زیابلوچ ء وتی نبشتگیں کتاب’’بلوچی زبانءِ راست نبیسی‘‘ءِ سرا تران کت۔ بلوچی زبانءِ نامداریں نام اے آر داد بلوچ ء واجہ اکبر بارکزئی ءِ ازم ءُ آئیءِ مشہورشعر ’’روچء کئے کُشت کنت‘‘ءِ سرا وتی دانک درشان کت انت۔ بلوچی زبانءِ پٹ پول ءِ پڑء نامداریں نام رحیم مہر ء مُلا فاضل ءِ زند ءُ ازمءِ پجّیا دگہ نوک چاپ بوتگیں کتابانی سرا وتی درّیں دانک درشان کت انت۔ واحد بندیگ ء گْوشت کہ میان استمانی لبزانکء ماں بلوچیء رجانک کنگ جْوانیں کارے ما رجانکارانی ھمک وڑیں دلبڈیء ساڑی ایں ۔ گچینی مہمان واجہ اکبر بارکزئیء ’’سید ھاشمی ریفرنس کتابجاہ‘‘ءُ پروفیسر صبادشتیاریءِ کردساڑات انت ءُ آئیء ’’گلکارءُ چکن کار‘‘ءِ دوبر چاپ ءُ مُلافاضل ءِ زندءِ سرا رحیم مہرءِ ردءُ بندداتگیں کتاب یک جوانیں گامگیج یے لیک ات ۔عاصم زہیرءِ ردءُ بند داتگیں کتاب ’’گروکی شہم ‘‘کہ انور شاہ قحطانی ءِ زندءُ ازم ءِ سرا انت سکّ باز ساڑات ۔ اے آردادءِ رجانک کتگیں فرانسیسی شاعر ءِ شعرانی سرا تران کنانء گْوشت کہ میان استمانی لبزانکء ماں بلوچی زبانء رجانکاری یک جوانیں گامگیج یے ءُ اے پڑء کار کنوکیں مردم ستا کرز انت۔ ھمے درگتء وش نیوزءِ نیوز ڈائریکٹر اویس اقبال ء جار جت کہ ’’وش نیوز‘‘ءِ واہگ انت کہ ’’سید ھاشمی ریفرنس کتابجاہءِ کمکء بلوچی زبانءِ سرا یرِّدیں(سلسلہ وار) مراگشے برجم بہ داریت۔ کتابجاہءِ کارمستر ڈاکٹر رمضان بامری ء بلوچ مہلوک ءِ گوں ’’سید ھاشمی ریفرنس کتابجاہ‘‘ء ھمراہ داریءُ دوزواہی ساڑات ءُ گْوشت کہ مارا بلوچ راجءِ ھمراہ داریءُ دوزواہی پکار انت امیت انت کہ دیمترا ھم مئے راج گوں ما ھمگام ءُ ھمراہ دار بیت۔ ڈاکٹر رمضان بامریء پد کتابجاہ ءِ نوکءُ دوبر چاپ بوتگیں شعرءُ دستونک ءُ شاعریءِ دگہ تہرانی سرا پروفیسر صبادشتیاریءِ نبشتگیں کتاب ’’گلکارءُ چکن کار‘‘، رحیم مہرءِ ردءُ بنداتگیں کتاب ’’ملا فاضل ءِ زندءُ ازم‘‘، اے آردادءِ فرانسیسی شاعرءِ رجانک کتگیں شعرانی کتاب، ’’خماراں بہ بئے ‘‘ءُ انورشاہ قحطانی ءِ زندءُ ازم ءِ سرا ورنائیں پٹ پول کار عاصم زہیر ءِ ردءُ بند داتگیں کتاب’’گروکی شہم ‘‘ءُ دگہ دو کتاب (سید ھاشمی ریفرنس کتابجاہءِ چاپ کتگیں نہ انت) زیابلوچ ءِ ’’بلوچی زبانءِ راست نبیسی‘‘،عزیز کلمتی ءِ ’’سندھی آزمانک‘‘ءِ دیمدرائی کنگ بوت ۔تران کنوک ءُ گشتانک دیوکیں مہماناں ابید دگہ گچینی مہمانانی تہا بشیر بیدار ، برکت برجان ، نورمحمد نورل ، عاصم زہیر ءُ دگہ مہمان ھوار اتنت ۔اے بہرءِ جار چین غلام رسول کلمتی ات۔

دیوانءِ دوبہر شاعری ئیگ ات۔شاعریءِ بہرءِ گچینی مہمانانی تہااکبر بارکزئی، ظفر علی ظفر، بشیر بیدار،ظفر کریم، عمران ثاقب، برکت برجان ، رشید خان ، حمل پرویز ،اصغرعلی آزگ،عزیز ارمان، عبدالخالق خالد ءُ دگہ ھوار اتنت ۔دگہ ورنائیں شاعرانی تہا میر ساگر رحمان،زبیر واہگ ، شیر جان نذر، وسیم وارث، سراج رحیم، بیبگر بشیر،دیدگ بشیر،جبار غریب، مہر تمپیءُ دگہ شاعر اں وتی شعر ءُ پربند ونت انت۔ اے بہر ءِ جار چین شرف شاد ءُ چندن ساچ اتنت۔
دیوانء ملیر ، لیاری ، اورنگی ء ابید چہ بلوچستانءِ دورءُ دراجیں دمگاں آتکگیں مردماں مزنیں کساسے ء بہر زرت ۔ دیوان شپءِ نُہہ ء آسر بوت۔

Akber Barakzai

2

Akber Barakzai