You are currently viewing پروفیسر صبادشتیاری ءِ ششمی سالروچءِ دیوان
پروفیسر صبادشتیاری ءِ ششمی سالروچءِ دیوان

پروفیسر صبادشتیاری ءِ ششمی سالروچءِ دیوان

  • Post category:News

پروفیسر صبادشتیاری ءِ ششمی سالروچءِ دیوان
بلوچی زبان ءَُ لبزانکءِ ھزمتانی مُزّ ءَ ’’صباداد‘‘بلوچی زبانءِ نامداریں گِدارنویسءَُ آزمانکارمنیر احمد بادینی ءَ دیگ بوت۔
شاعری یک ادارکی جزبگے ، شاعریءَ گیش بلوچی زبانءَ ردانکءِ سراکارا پکار اِنت ، ورنارِدانکءِ سرا کار بہ کننت۔منیر احمد بادینی
دیوانءِ سے بہر اتنت :۔کتابانی دیمدرائی۔ پروفیسر صبادشتیاریءِ زندءَُ ازمءِ سرا چمشانک ۔ شاعری دیوان۔

چہ سید ھاشمی ریفرنس کتابجاہءِ نیمگایک شمبے، 21مئی2017ءَ ،ماں بلوچ ھال چاکیواڑہ لیاری کراچیءَ یک پُرارزشیں دیوانے برجم دارگ بوت۔دیوانءِ پاگواجہی شہید صبادشتیاریءِ عکسءَ کتءَُ گچینی مہمان بلوچی زبانءِ نامداریں گِدار نویس ءَُ ناول نویس منیر احمد بادینی اَتءَُ دومی مہمان بشیر بیدارءَُ احمد اقبال اتنت ۔جارچینی ءِ ڈُبّہ بشیر بلوچ گون اَت۔دیوانءِ بنگیج چہ پاکی59ں پروردگارءِ نامءَ غلام رسول کلمتیءَ کت۔دیوانءِ بنداتءَ بلوچی زبانءِ نامداری59ں گْوشکند نویس محمد بیگ بیگلءِ یاتءَ یک منٹےءِ بے تواری برجم دارگ بوت۔محمد بیگ بیگلءَ وتی زندءِ گڈّی روچاں وسائت(وصیّت)کتگ ات کہ آئیءِ بیرانیءَ پد آئیءِ زانشی ءَُ لبزانکی مڈّی(کتاب)سید ھاشمی ریفرنس کتابجاہ ءَ دیگ بہ بنت۔

دیوانءِ اولی بہرءَ پنچ کتابانی دیمدرائی کنگ بوتگ کہ آیاں تہا’’فلسفہ اسلام و یونان‘‘(پروفیسر صبادشتیاری)، ’’زِردیر اِنت‘‘(عاصم زہیر)،’’فکرءِ ستا‘‘(امین ضامن)،’’تاریخ زبان و ادبیات بلوچی‘‘(ڈاکٹررمضان بامری)ءَُ ’’نبشتہ رہبند ءَُ بُنرہبند‘‘(ایوب قاسم ءَُ غلام رسول کلمتی)ءِ کتابانی دیمدرائی بوت ۔دیمدرائی ءِ دودءَ غلام رسول بلوچ، منیر احمد بادینی، رحیم بخش آزاد، استاد ایوب قاسم، حسن علی حسن ،بشیربیدار،احمد اقبالءَُ ڈاکٹر رمضان بامریءَ بہر زُرت۔ کتابانی دیمدرائی ءَ پد چاپ بوتگیں کتابانی مولءَُ مُراد ءِ سرا حسن علی حسن،شرف شاد،استاد ایوب قاسم ءَُ ڈاکٹر رمضان بامریءَ چمشانک دات۔دودءِ پدا کتابجاہ ھمک دومی سالءَ بلوچی زبانءَُ لبزانکءِ ھزمتانی مُزّءَ یک نویسکارے ءَ پہ صبادادءَ نامینیت۔ اے رندی کتابجاہءَ زبانءَُ لبزانکءِ ھزمتانی سرا واجہ منیر احمد بادینی ءِ نام پہ صبادادءَ نامینتگ اَت ۔کتابجاہءِ کارمستر غلام رسول بلوچءَ صباداد واجہ منیر احمد بادینیءِ ھزمتءَ پیش کت ، ڈاکٹررمضان بامری ءَُ خالد بلوچ ھم ھمراہ اتنت۔

کتابانی دیمدرائی ءَُ چمشانکءَ پد دومی بہرکہ پروفیسر صبادشتیاریءِ زندءَُ ازمءِ سرا اَت ۔بشیربیدارءَ وتی گشتانک دیانءَ گْوشت کہ شہید صبادشتیاری ءِ وڑیں مردم باز کم پیداگ بنت ۔شہیدءَ زانشءَُ لبزانکءِ ھمک تکءَُ پہناتءَ وتی بور تاتکگ۔مستری59ں جہد آئیءِ تاکبندءَُ ماہتاکانی جم کنگ اَت۔آئیءَ گْوشت کہ من جست کت کہ اے تاکبند ءَُ ماہتاک کجام درد ءِ درمان اَنت گڈا واجہ صبادشتیاریءَ منا پسّو دات کہ اے جُستءِ پسّوءَ آیوکی59ں وہد وت دنتءَُ مروچی سید ھاشمی ریفرنس کتابجاہءِ شکلءَ ھما جستءِ پسّو منی دیما اِنت۔بشیر بیدارءَ پد ڈاکٹر رمضان بامریءَ تران کنانءَ گْوشت کہ شہید صبادشتیاریءِ مستریں جہد ھمے بوتگ کہ ادارہ جوڑ کنگ بہ بنت پرچا کہ مردم بدل بنت ءَُ رونت بلے ادارہ ماننت ءَُ ادارہ راجاں زندگ دارنت ءَُ دیمروی دینت۔ڈاکٹر رمضان بامریءَ پدوش نیوزءِ سروک( Chief Executive)احمد اقبالءَ وتی گشتانکءِ تہا گْوشت کہ من دنیگا صبادشتیاریءِ ھچ دیوان یلہ نہ داتگ ءَُ ھمک دیوانءَ بہر زرتگ۔ پہ زبانءَ ھزمت کُلی59ں انسان زاتءِ ھزمت ءِ برابر اِنت۔آئیءَ گْوشت کہ وش نیوز ءَُ وژنریءِ سوبمندیءِ سبب من سید ھاشمی ریفرنس کتابجاہءَ دات کت کناں ءَُ منی کمک مُدام پہ کتابجاہءَ برجاہ مانیت ۔ایشیءَ پد رحیم آزاد ءَ تران کنانءَ گْوشت کہ کسان کسانیں چیزانی جم کنگءَ واجہ لوگ لوگءَ شتگ۔آئیءَ گْوشت کہ ھما کار کہ سیدھاشمیءَ یلہ داتگ اَت ،آ کار واجہ صبادشتیاریءَ دیما برتگ۔گڈسرا گچینی مہمان منیراحمدبادینیءَ وتی مارشتانی تہا گْوشت کہ چہ سید ھاشمی ریفرنس کتابجاہءِ نیمگا پہ منا ’’صباداد‘‘یک مزنیں شرپے ۔آئیءَ گْوشت کہ صبادشتیاریءِ جہد ءَُ کوشست، نندءَُ پادا چہ کُلّیں مردماں جتا اَت ،آئیءَ وتی پیلویں زند پہ بلوچی زبانءَُ لبزانکءَ ندْرکتگ ات ءَُ آ پہ بلوچی زبان ءَُ بلوچی لبزانک ءَ چہ ھر کسءَ دیماتر اَت ءَُ آئیءِ چہ درستاں مستریں شری ایش اَت کہ ھرچے آئیءَ گْوشتگ ات ،آئیءَ کتگ ءَُ پیش داشتگ ات۔ دیمتراآئیءَ گشتانک ءَ دیانءَ گْوشت کہ من انگریزیءَُ اردو ھم نبشتہ کت کناں بلے من بلوچی ءِ پڑ پمیشکا گچین کتگ کہ منی وتی زبان اِنت۔بلے من زانتگ کہ من سترانگریزی ءَُ اردو نبشتہ بہ کناں شیکسپیئر ءَُ علامہ اقبال جوڑ نہ باں۔آئیءَ گْوشت کہ من گِدار پہ وہد ءِ گْوازینگءَ نبشتہ نہ کتگ آں بلکیں اے منی دلءِ لہڑ ءَُ پاہار اَنت کہ گِدارانی دْروشمءَ شمئے دیما اَنت ۔من پروفیسر صبادشتیاریءِ زندءَ یک گِدارے نبشتہ کتگ کہ آئیءِ نام ’’صباءَ ھرکس زانت‘‘اِنت ، پمیشکا بازیں مردماں منا جست کتگ کہ اے گِدار زانا توصبادشتیاریءِ شہادت ءَ پد نبشتہ کتگ راستی ایش اِنت کہ اے گِدار من صبادشتیاریءِ زندءَ نبشتہ کتگ،البت چاپ رندا بوتگ۔ آئیءَ گْوشت کہ شاعری یک ادارکی جزبگے ، شاعریءَ گیش بلوچی زبانءَ ردانکءِ سرا کار کنگ پکار اِنت ، ورنارِدانکءِ سرا کار بہ کننت۔آئیءَ گْوشت کہ نوک باہندیں ورنا وتی پیسری نبشتہ کارانی پیرویءَ بہ کننت یا وَ چہ آیاں گہترءَُ شرّتریں چیز دی59ما بیاراَنت۔واجہ بادینی ءَ گْوشت کہ باید اِنت ما وتی جنیں آدماں زندءِ درہیں پڑاں ھوار بہ کنیں پرچا کہ راجءِ تہا زالبولانی کچّ پنجاہ در سد اِنت، وتی زالبولاں عزت ءَُ شرپ بہ دئے ءَُ دیما بیارِت۔ دومی بہرءِ گڈسرا کتابجاہءِ کارمستر غلام رسول بلوچ ءَ مردمانی منّت گِرانءَ گْوشت کہ مروچی شہید صبادشتیاری مئے نیاما موجود نہ اِنت بلے آئیءِ پگرءَُ فلسفہ ءَُ آئیءِ گچین کتگیں کِشک مارا گون اِنت ءَُ ما ھما کِشکءَ دیما جنزان ایں۔آئیءَ گْوشت کہ کتابجاہءِ کارانی دیمرویءِ ھاترا زانشی بورڈ جوڑ کنگ بوتگ کہ پٹ پولی کاراں دیما بارت۔دومی بہرءِ ھلاسیءَ پد کوّاس ءَُ زانتکاراں کتابانی ٹیکی دیگ بوت کہ آیانی تہا لالہ فقیرمحمد، فتح محمد نظر،گل حسن کلمتی، ناصرکریم، جمیل ، کامریڈ واحد، حبیب حسن، واحدمراد، اقبال تبسمءَُ دگہ مردم ھوار اتنت۔

گُڈّی بہر شاعریءِ دیوان اَت کہ ایشیءِ سروکی ظفر کریمءَ کتءَُ آئیءِ پجّیا اسٹیجءِ سرا اکبر غمشاد،بشیر بیدار،اسحاق خاموش، غلام رسول کلمتی، معراج مومن نندوک اتنت ۔ جارچینیءِ ڈُبّہ حسن علی حسنءَ گون اَت ۔چندن ساچ،نبیل نور، شیر جان،عزیزارمان، ھمّل پرویز،عمران ثاقب، غلام رسول کلمتی، معراج مومن،اکبر غمشاد،بشیر بیدار،اسحاق خاموش،ظفر کریم ءَُ دگہ ورنائیں شاعراں وتی شعر ءَُ پربند دیوانءِ دیما درشان کت انت۔
دیوانءَ چہ دیر ءَُ دراجءَ مردمانی مزنیں کچّےءَ بہرزرتگ ات۔داں ساعت نُھ ءَ دیوان آسر بوت۔