عطا شاد ءِ یات ءَ سید ہاشمی ریفرنس کتاب جاہ ءِ نیمگا چہ دیوان
فروری13ِ، 2019 ءَ ماں کوہنیں گولیمار کراچی ءَ باقی بلوچ روڈ کمیونٹی ہال لائبریری ءَ بلوچی ءُ اردو ءِ نامداریں شاعر عطا شاد ءِ یات ءَ سید ہاشمی ریفرنس کتاب جاہ ملیر ءِ چیر دستی ءَ دیوانے برجم دارگ بوت۔ دیوان سئے بہرانی تہا اَت۔ اولی بہر ءَ عطا شاد ءِ ازم ءِ سرا گپ جنئگ بوتگ ۔ دیوان ءَ تران کنان ءَ چندن ساچ ءَ گشت کہ عطا شاد ءَ بلوچی لبزانک ءَ را لہتیں انچیں لچہ داتگ کہ اگاں آیاں میاں استمانی لبزانک ءِ مزنیں لچہ کارانی لچہانی کش ءَ ایر بکن ئے تہ ہچ وڑا کمتر لیکھگ نہ بنت بلکیں آیانی بروبری ءَ کن اَنت۔ اے درگت ءَ آئی ءَ شپانک، میر ادیرہ ءِ میر، دل گریت ءُ شپ ناریت ءُ اے دگہ لچہانی مثال دات اَنت۔ دیوان ءَ اردو ءِ نبشتہ کار رمضان بلوچ ءَ تران کنان ءَ گشت کہ عطا شاد ءَ نہ ایوکا بلوچی لبزانک ءِ تب کتگ بلکیں اردو ءِ تہا انچیں گالبند کارمرزکتگ کہ مروچی اردو ءِ نبشتہ کار ءُ شاعر ہم عطا شاد ءِ ہما لبزاں کارمرز کنگ ءَ اَنت۔ بلوچستان یونیورسٹی ءِ بلوچی ءِ استاد ڈاکٹر رحیم مہر ءَ عطا شاد ءِ شاعری ءِ تہا کارست سازی ءِ سرا تران کنان ءَ گشت کہ عطا شاد ءَ وتی لچہانی تہا کارست سازی جوانیں وڑے ءَ کتگ ءُ اودا ہما مارشت کہ بیان کنگ بوتگ انت آ مارشت بے مثال اَنت۔ بلوچی نامداریں نبشتہ کار ءُ نگدکار اے آر داد ءَ عطا شاد ءِ سرا نبشتہ کتگیں اے دگہ نبشتہ کارانی نگدی نبشتانکانی سرا چمشانک دات ءُ آہانی نزوری ءِ بابت ءَ شون دات کہ عطا شاد ءِ بابت ءَ بلوچی ءَ چونیں چونیں نبشتانک نبیسگ بوتگ۔ دیوان ءِ پاگواجہی کتاب جاہ ءِ کارمستر ڈاکٹر رمضان بامری ات کہ آئی ءَ عطا شاد ءِ سرا تران کنان ءَ دیوان ءَ آؤکیں مردمانی ہم منت گپت اَنت۔ دیوان ءِ اولی بہر ءِ جار چینی ءِ ڈبہ سید ہاشمی ریفرنس کتاب جاہ ءِ کارگشاد بشیر بلوچ ءِ کوپگان ات۔
دیوان ءِ دومی بہر مشاعرہ ات کہ آئی ءِ جار چینی ءِ ڈبہ اے آر داد ءِ کوپگان ات ءُ دیوان ءِ پاگواجہی اصغر علی آزگ ءَ کت۔ دیوان ء، حاصیں مہمان، ظفر کریم، عمران ثاقب ءُ وحید نور اتنت۔ دیوان ءَ شیرجان نظر، عزیز ارمان، حمل پرویز، دلیب رحیم، صغیر عزیز، سمین زیب، بالاچ بالی، زرین آسکانی، داؤد کلمتی، صلاح الدین بے وس، عطا مہر ءُ اے دگراں وتی شعر ونت اَنت۔
دیوان ءِ گڈی بہر ساز ءُ زیملی ات کہ آئی ءِ تہا بلوچی ءِ نامداریں غزل گش ہارون شیخ ءَ عطا شاد ءِ اردو ءُ بلوچی ءِ غزل گشت اَنت ءُ دیوان ءِ بالاد وشنود کُت ءُ دیوان ءِ گڈی گشندھ سلیم بلوچ ءَ ہم وتی جوانیں ازمکاری ءَ گوں عطا شاد ءِ بلوچی غزلاں گوں دیوان ءِ تب بدل کُت۔ ساز ءُ زیملی مراگش ءِ جار چینی ءِ ڈبہ حمل پرویز ءِ کوپگان ات۔
گڈسرا سیدہاشمی ریفرنس کتاب جاہ ءِ اگدھ داراں مراگش ءَ بہر زوروکیں مردمانی منت گپت اَنت ءُ دیوان شپ ءِ ساعت ہشت ءُ نیم ءَ آسر بوت۔
