Home / Reports / Progress Report 2013 – دیمروی نگدال

Progress Report 2013 – دیمروی نگدال

گلیں باسکاں

ھنچوش کہ شما سرپد اِت مروچی کتابجاہ ء وتی سفرءِ دہ سال سرجم کتگ ءُ پہ جوانیء دیم پہ وتی منزلءُ شہید صبادشتیاریءِ دیستگیں واب بزاں’’ انسٹیٹیوٹ آف بلوچیالوجی‘‘ ءِ پلّوء جنزان اِنت ۔ آ روچ دیر نہ اِنت کہ کتابجاہ وتی مرادانی ھزار گنجیں منزل ء گوں راجی کمک ءُ دلبڈی ء سربیت۔ پیش کہ من کتابجاہءِ دیمروی نگدال ۲۰۱۳م شمئے دیمء ایر بہ کناں من لوٹاں کہ کتابجاہءِ پیسری کارانی بابتء سرپدی بہ دیاں ۔

کساس سی ءُ پنچ سال پیش شہید صبادشتیاریء اے گپّ مار اِت کہ مئے چاگردءِ تہء چوشیں ھچ علمی ءُ پٹ پولی ادارہ نیست کہ آ بلوچ، بلوچی ءُ بلوچستان ءِ سرھال ءِ سرء شنگ ءُ شانگیں مواداں یکجاہ بہ کنت ءُ آیاں سائنسی دروشمے ء بہ پہریزیت۔ ءُ پہ راج ءِ اوبادگاں یک علمی ، لبزانکی ءُ دودربیدگی چاگردے بہ دنت ۔اے رِدء پروفیسر صبادشتیاریء ھشتاد ءِ دہک ءِ گڈسرء گامگیج زرت انت ءُ پانزدہ سالانی تچ ءُ تاگ ءُ دلسیاھی ء پد یک ھنچیں بنجلے ءِ جوڑ کنگ ء سوبمند بوت کہ اودء بلوچ راج، بلوچی زبان ءُ بلوچستان ءِ بابتء موادانی یک مزنیں مڈی یے جم کنگ بوتءُ آئیءِ نام’’ سید ھاشمی ریفرنس کتابجاہ‘‘ ایر کنگ بوت۔اے کتابجاہ بلوچ ، بلوچی ءُ بلوچستان ءِ حوالہ ء اولی پٹ ءُ پولی بنجل انت اگاں ما اے چوش بہ گْوشیں دروگ نہ بیت کہ اے ادارہ بلوچ ، بلوچی ءُ بلوچستانء حوالہء اولی میان اُستمانی علمی ، لبزانکی ءُ راجدپتری بُنجل اِنت،بی بی سی اردوسروس ء وتی یک رپورٹےءِ تہء اے گپ منّ اِتگ۔بلوچ ، بلوچی ءُ بلوچستانء ابید دگہ بازیں سرھالانی سرء مزنیں کچّے ء مواد دست کپنت ،کہ چہ اِدء دور ءُ دراجیں ھند ءُ دمگاں پٹ پول کار ءُ دگہ علم دوستیں مردم علمی مڈیانی شوھاز ء کاینت ءُ ھمے مڈّیاں آیوکیں اوبادگاں سرکنان انت ۔ کتابجاہءِ مستریں سپت ایش انت کہ ایشی ء کلیں بلوچ راج ءِ کمک ءُ دلبڈی گون انت۔
’’سید ھاشمی ریفرنس کتابجاہ ‘‘ ءِ بُن ھِشت ۲۱ دسمبر ۲۰۰۳ ء ایر کنگ بیتگ۔ اے رد ء بازیں نند ءُ نیاد برجم دارگ بیتگ انت ۔ سید ھاشمی ریفرنس کتابجاہ ءِ اولی نیاد ۲۹دسمبر۲۰۰۲ ء بغدادی لیاری ء برجم دارگ بیتگ ات ۔ کہ اولی نیاد ء کراچی ءِ گچینی مردماں چہ بازیں ھند ءُ دمگاں بہر زرتگ ات ۔ ھمے دیوان ء یک ادارکی کمیٹی یے جوڑینگ بوت ۔ کمیٹی جوڑینگ ءِ پجی ء راہ ءُ راھبندانی اڈ کنگ ء گام گیج زیرگ بیتگ انت ءُ پہ کتابجاہ ء بان بندگ ءِ فیصلہ کنگ بوت۔
پہ کتابجاہ ء پکاریں بان ءِ ھاترء واجہ عظیم دہکان ء چہ وتی کِشت ءُ کِشاری ء ڈگار ء یک بہرے پہ بان ء بکشات ۔ ۲۱ دسمبر ۲۰۰۳ ء دہکان گارڈن ء پہ کتابجاہ ءِ بان ءِ بُن ھِشت ایر کنگ ء یک مراگشے برجم دارگ بوت ءُ مراگش ءِ گڈ سرء کتابجاہ ءِ ادارکی کارمستر بلوچ دانشور ءُ کوّاس واجہ لعل بخش رند ء کتابجاہ ءِ بان ءِ بُن ھِشت گوں وتی دستا ں ایر کت ۔ ھما روچ ء پہ کتابجاہء اولی باسکی فارم ھم واجہ لعل بخش رند ء پُرکت ءُ باسک کاری ءِ بنگیج کت ۔ ۱۳مارچ ۲۰۰۵ء کتابجاہ پہ وانگ ء پچ کنگ بوت۔ کتابجاہ ءِ سیمی دیوان ء واجہ لعل بخش رند ءِ ھزمتانی مُز ء یک قراردادے ءِ صورت ء واجہ لعل بخش رند تا زند کارمستر گچین کنگ بوت ۔

کتاب

کتابجاہء وتی راستیں سفر گوں دوھزار کتاباں کت ۔ مروچی دہ سالاں پد کتابانی کچ کم ءُ گیش دہ ھزار ء سر بوتگ بلے اے گپّ ء من ادء گیشّینگ لوٹاں کہ تاکبند ءُ ماھتاکانی ھم مزنیں کچّے مارا چاپارءُ شونکاراں کمک کتگ کہ اے گوں دگہ کتاباں ھوار نہ انت ۔ ادء یک گپّے دلگوش کرزیت کہ سی در سدکتاب مارا بلوچ راجءِ دوزواہ، زانتکار ءُ پٹّ پول کاراں کمک کتگ ءُ شست ءُ پنچ در سد کتاب کتابجاہءِ بُنپد ایر کنوکاں داتگ ۔ کتابجاہءِ گوں وتی زرّ اں زرتگیں کتاب پنچ در سد انت اے وڑء ما گْوشت کنیں کہ کتابجاہ ءِ تہء کُلّیں کتابانی دیگ ء بلوچ مہلوک ءِ کمک ھوار اِنت ۔ ایشانی پجّی ء لہتیں کتابانی چاپ کنگء بازیں ورنا ھم دیمء آتکگ انت ءُ آاے پڑء پہ دل ستک کار کنگء انت۔

آسراتیانی کمک 

ھنچوش کہ سما سہی اِت کہ ھمک ادارہ بے آسراتیاں سرجم نہ بیت ، ھمے وڑء کتابجاہ ءِ مدام ھمے جہد بوتگ کہ آ وانوک ، پٹ پول کار اں وتی وسءُ واک ء آسراتی بہ دنت ۔ اے ردء کتابجاہءِ وانگجاہء ایئرکنڈیشن ، پچیں شیلف ءُ آرام دیوکیں کرسی، فوٹو اسٹیٹ ءِ آسراتی ، آپ سارت کنوکیں کُلمن بزاں کولر ءُ دگہ ۔ ایشاں ابید ھما کتاب کہ بہائی انت پہ باسکاں آ کتابانی سرء سی درسد ءِ سہولت ھم کتابجاہ دنت۔ لہتیں آسراتی مارا چہ بلوچ دوزواھانی نیمگء رستگ انت کہ آیانی تہء کمپیوٹر ، کرسی ءُ ٹیبل ،، اسکینر،صبادشتیاری پٹ پولی بنجل ءِ پرنیچر ھوارانت ۔ھمے زوتاں چندے ورناھاں وتی کمک ء یک کولرے ھم زرتگ ۔کتابجاہ ءِ جہد ھمیش انت کہ وانوکءُ پٹ پول کاراں دیمترء ھم ھمے وڑء آسراتی بہ دنت۔

باسک

اولی سال ء کتابجاہءِ باسک جوڑ کنگ کار چہ ۲۰۰۴م ء بنگیج کت،اولی سال ء ھشتاد باسک اتنت کہ مروچی اے کچ سیزدہ سدء سربوتگ ۔باسکانی تہء یک مزنیں کچے درملکاں جاہ منندیں بلوچ انت ۔

کورس

۔چہ ۲۰۰۱ء بگر داں ۶۲۰۱۳ ء ’’بلوچی بنگیجی ءُ بلوچی سرٹیفکیٹ کورسانی کلاساں۸۴۶(ھشت سد ءُ چِلّ شش) نودربراں داخلہ زرتگ کہ چریشاں شست در سدء چکاس داتگءُ سوبمند بوتگ انت۔ چریشاں بازیں نودربراں مقابلہ ءِ چکاساں ھم بہر زرتگءُ مزنیں اُ گدہاں سر بیتگ انتءُ لہتیں ھالرسانک ءُ دگہ بازیں پڑاں مروچی سر بوتگ انت۔
دگہ یک گپّے دلگوش کرزیت کہ چہ سید ھاشمی ریفرنس کتابجاہءِ کمک ء ماں کراچی دانشجاہ بزاں یونیورسٹی ء بلوچی کلاس برجم دارگ بوگ انت کہ آ چریشاں جتا انت۔

ھمک سال چہ کتابجاہءِ نیمگء داد دیوان برجم دارگ بیت کہ آئیءِ تہء جوانیں نمبراں سوبمند بوتگیں نودربراں دادءُ سند دیگ بیت۔اے رِدء شش داد دیوان پیشء برجم دارگ بوتگ، اے ھپتمی داد دیوان اِنت ۔کتابجاہءِ واھگ انت کہ بلوچی زبان ءِ کورسانی پہنات پْراہ تر کنگ بہ بیت ءُ ھما دمگاں کہ بلوچ نندوک انت ، اودء اے کورس برجم دارگ بہ بنت۔

انسائیکلوپیڈیا بلوچستانیکاکمیٹی

کتابجاہ ءِ پُر ارزش تریں کاراںیکے بلوچستانیکاءِ نامء یک انسائیکلوپیڈیا تاکبند ءِ شنگ کنگ انت کہ ایشیءِ جار چارسال پیش جنگ بوتگ ات۔ اے ردء شہید صبادشتیاری ءُ ڈاکٹر حمید بلوچ ء بلوچستان ءِ بازیں ھند ءُ دمگاں ترءُ تاب کتگ ءُ گْونڈیں ٹیم جوڑ کتگ کہ اے ردء مواداں مُچ بہ کن انت۔بلے بازیں سالانی گْوزگء پد ھم مارا چہ بلوچستان ءِ دیر ءُ دراجیں ھند ءُ دمگاں چوشیں مزنیں موادے دست نہ کپتگ۔البت ڈاکٹر حمید بلوچ ء چہ وتی نیمگء بازیں مواد یکجاہ کتگ انت ءُ وتی لوگءِ یک کوٹی یے پہ خاص ھمے مواداں ندرکتگ ۔ دومی کتابجاہءِ وتی بازیں نگیگیں جاور بوتگ کہ چریشیءِ سبب ء ھم کار چوش کہ دیمء روگ لوٹتگ ات ، نہ شتگ ۔ اے نہ ایوکء یک دراج مدتیں کارے بلکیں پہ ایشیء مزنیں مالی کمکے ھم پکار اِنت۔ مالی کمکءِ پجّی ء پہ اے کارء یک جتائیں جاگہے ھم بیگ لوٹیت ۔ کتابجاہءِ وتی گْورء چوشیں مالی بود نیست کہ آ اے گرانیں کارء پہ اِشتاپیں گامگیجانی تہء بہ زوریت ۔ البت اے ردء کتابجاہ ء گوں بازیں ادارہ ءُ مردماں رابطہ کتگ ، امید اِنت کہ اے رِدء زوت یک راھے در کئیت ۔

زانشی کمیٹی

کتابجاہءِ کمیٹیانی تہء زانشی کمیٹیءِ ذمہ واری ’’بلوچی بنگیجی کورس ‘‘ءُ ’’بلوچی سرٹیفکیٹ کورس‘‘ءِ چارءُ بیچار انت ۔ ایشیءِ پجّی ء وھدءِ لوٹ ءُ گزرانی پدء پہ بلوچی زبانءِ دیمرویءُ ’’بُنرہبند ‘‘ءِ سرء کار کنگ ءُ آئیء تچک کنگ انت۔ کتابجاہ ء چہ۲۰۰۶م ء بلوچی کورسانی وانینگ ءِ کار بنگیج کتگ ۔ اول سالء بلوچی سرٹیفیکٹ کورس ءِ وانینگ بوتگ کہ بلے ھمے درگتء کتابجاہ ء مار اِتگ کہ چہ سرٹیفیکٹ کورس ء پیش بنگیجی کورس المی اِنت ۔ کتابجاہء ۸۔۲۰۰۷م ء چہ بنگیجی کورس ھم بندات کت۔باسک اے گپّ ء ھم سہی بہ بنت کہ اے درستیں کارانی ذمہ واری زانشی کمیٹی ئیگ انت۔ نہ ایوک ء یک رندے کتاب چاپ کنگ ءُ شنگ کنت انت بلکیں وھد پہ وھدایشیءِ سرء چمشانک دیگ ، نزوریانی دیرکنت ءُ گہتر کنگ ، کلاسانی برجم دارگ ، گوں استاداں رابطہ کنگ ، دیر دراجیں ھند ءُ دمگاں پہ نودربراں کتابانی رسینگءُ چکاس گرگ ءُ چکاسانی آسراں شنگ کنگ ، ایشیءِ پجّی ء سندجوڑ کنگ ءُ ھما ھندءُ دمگاں راہ دیگ ءِ کار ھوار انت۔تنی وھدے زانشی کمیٹی ء کورسءِ چار رندء نزوری کشتگ انت ءُ دوبر چاپ کتگ۔ گڈّی چاپءِ تہء بازیں چیز کہ چد ءُ پیسر بلوچی زبان ء رواج نہ بوتگ ،چوشکہ ’’نبشتہ نشان‘‘، ’’گیش شمار‘‘، ’’دانگاں‘‘ھوار کنگ بوتگ انت۔امید کنیں کہ دیمترء ایشیء چدءُ گہتر کنیں ءُ وھدءِ لوٹ ءُ گزرانی پدء اے کارء دیمء بران کنیں۔ما گْوشت کنیں کہ اے وڑء بلوچی زبان ءِ منّتگیں لکوڑءِ نیمگء کتابجاہ ء یک پُرارزشیں گامگیج یے چست کتگ۔ ادء من دگہ ھم یک گپّے گیشّینگ لوٹاں کہ چہ کتابجاہ ءِ نیمگء اے کورسانی یک گْونڈیں فیسے ایر کنگ بوتگ کہ آ نہ بیگ ءِ حساب انت ، البت کورس وانینوکیں استاد وتی رزاءِ سرء وانینگ ء انت ءُ آیاں ھچ وڑیں زرّی کمک دنیگت دیگ نہ بوتگ۔ کمیٹیءِ دست چیرء ملیر ، لیاری ءِ پجی ء بلوچستان ءِ بازیں شہراں چوشکہ پسنی، گوادر ، پیشکان ، کیچ ، شال ءُ نوشکے ء ھردوئیں کورسانی کلاس برجم دارگ بوتگ انت ۔ ’’بلوچی بنگیجی ءُ بلوچی سرٹیفکیٹ کورسانی کلاساں۸۴۶(ھشت سد ءُ چِلّ شش) نودربراں داخلہ زرتگ کہ چریشاں پنجاہ در سدء چکاس داتگءُ سوبمند بوتگ انت۔ چریشاں بازیں نودربراں مقابلہ ءِ چکاساں ھم بہر زرتگءُ مزنیں اُ گدہاں سر بیتگ انت۔

شہید صبادشتیاری پٹ پولی بنجل 

کتابجاہ ءِ بُنیاد ایر کنوک واجہ صبادشتیاری ءِ شہادت ء پد پہ واجہءِ نامء کتابجاہ ء یک جتائیں جاگہے گیشینتگ ۔ اگاں کسے واجہ صبادشتیاریءِ زند ءِ سرء چیزے پٹ پول کنگ بہ لوٹیت اودء آئیء واجہءِ زندءِ بابتء بازیں چیزدست کپ انت ، بلوچی عملی چاگردء اے اولی پٹ پولی بنجل انت ۔

کراچی یونیورسٹی ء بلوچی کلاس دارگ۔

گْوستگیں سالءِ نگدال ءِ تہء اے گپّ ھست کہ پہ بلوچ راج ء اے مزنیں مِستاگے ات کہ کتابجاہ ءِ جہد ءُ کوشستانی سبب ء کراچی یونیورسٹی (دانشجاہ)ء بلوچی سرٹیفیکٹ ءُ ڈپلومہ ءِ کورس بنگیج بوتگ انت۔اے دومی سال اِنت کہ چہ یونیورسٹی ءِ نیمگء اے کار برجاہ اِنت ۔

وانگی (ٹیکسٹ بک) کمیٹی

ھنچوش کہ شما سہی ءُ سرپد اِت کہ بلوچستان ءِ بازیں جندی(پرائیویٹ) اسکولاں بنگیجی ، بنداتی ءُ اولی کلاس چہ گْوستگیں سے سالاں وانینگ بوھگء انت، اے سالء زانشی کمیٹی ء (۱) بلوچی بُنگیجی (۲) بلوچی بنداتی(۳) بلوچی اوّلی ءِ پجّی ء (۴) بلوچی دومی وانگی ھم سرجم کتگ ءُ اسکولاں وانینگ بوھگء انت۔’’بلوچی سیمی‘‘ءِ کار سرجم کنگ بوتگ ، ’’بلوچی چارمی‘‘ ءُ ’’بلوچی پنچمی ‘‘ءِ سرء کمیٹی ءِ باسکانی نیام ء شور ءُ صلاح بوھگ ء انت۔

تھیٹر کمیٹی

گوستگیں سال ء لہتے ازم کارانی شور ءُ صلاح ء پد یک تھیٹر کمیٹی یے جوڑ کنگ بوتگ ات کہ اے کمیٹی کتابجاہ ءِ مراگشانی تہء وتی کسمانکاں پیش کنت۔ کتابجاہ ءِ تھیٹر کمیٹی ءِ نیمگ ء چہ’’سوگندی دیوان ‘‘(مارچ ۲۰۱۱) ءِ تہء یک جوانیں کسمانکے پیش کت۔دومی کسمانک استادصبا ءِ اولی سالروچ(۳جون ۲۰۱۲) ءِ دیوانء استاد ءِ زند ءِ سرء’’ واب کندگ لوٹ ایت‘‘ ءِ نامء پیش داشت۔

مراگش ءُ دیوان

چہ کتابجاہءِ مول ءُ مراداں یک مولے وھد پہ وھدعلمی، ادبی ءُ دود ربیدگی مراگش ءُ دیوان دارگ انت۔ اے درگتا کتابجاہ ء گوستگیں دھ سالاں جہل ردا مراگش برجم داشتگ انت

(۱) سوگندی دیوان ءُ مراد ساحر،گل خان نصیر ء سید ظھور شاہ ھاشمیءِ یات ء ساز ءُ زیملی دیوان۔

(۲)شہید پروفیسر صبا دشتیاری ء لالہ لال بخش رند ءِ یاتءِ زند زانتی دیوان(ریفرنس )۔

(۳) داد دیوانءُ عباس علی زیمی، کریم رضا،مراد آوارانی، میر احمد دھانی، ءُ پروفیسر صبا دشتیاریءِ یات ء شعری دیوان۔

(۴) ماں گوادر، شال ، نوشکی، تربت (کیچ ) ء داد دیوان

(۵) ۵ لس مجلس دیوان

(۶) وھد پہ وھد ء کراچی ءُ بلوچستان ءِ جتا جتائیں ھند ءُ دمگاں سیمنار داشتگ۔

 اے وڑء کل ھشتاد ءُ دو (۸۲)دیوان برجم دارگ بوتگ انت۔ ایشانی تہ ء کتابجاہءِ کابینہء دھ سالانی نیامء جتاجتائیں بنگپانی سرء نیاد(میٹنگ ) ھم برجم داشتگ ءُ کار دیمء برتگ انت۔

کتابجاہءِ دود اِنت ھمک سال نامداریں شاعر ، نویس کار ،ازم کار یا کواسے ءِ نامء یاتگاریں شعری دیوانے برجم دار ایت ۔ اے دیوانء شاعر یا نویسکار ءِ ھزمتانی مُز ء آئیءِ نام ء یک یاتگاری شیلڈے ھم دیگ بیت ۔
ھمک دومی سالء لس دیوانءُ گچین کاری دیوان برجم دار گ بنت ۔ ھمک دومی سالء گچین کاریانی آسرء سوبمند بوتگیں اگدہ دارانی سوگندی مراگش برجم دارگ بیت ءُ آئیءِ تہء سازءُ زیملی بہرھم ھوار اِنت۔اے درگتء گْوستگیں سالء کتابجاہء اے دود ھم ایر کتگ کہ بلوچی زبان ،لبزانک ، دودءُ ربیدگ ءُ پٹ پولی پڑء کارکنوکیں مردمانی ھزمتءِ مُزّء یک شاعر، نویسکاریا پٹ پول کارےء شیلڈے دیگ بیت۔
کراچیءِ پجی ء بلوچستان ءِ دور ءُ دراجیں شہر ءُ دمگاں سیمینار ءُ یاتگاری دیوان برجم دارگ ۔

تاکبندانی پھریزگ(Digitization) 

کتابجاہء برزے سرحالانی سرا کتاب، رپورٹ ءُ دگہ وانگی مواداں چہ ابید مزنیں کچ ء تاکبند بزاں (Periodicals)کہ آئیانی تہء روتاک، ماھتاک ءُ ایدگہ تاکبند ھوار انت چتگ ءُ پھریزتگ انت، اے مڈی یے تہء بلوچی زبانءِ تہء چھاپ بیتگیں گیشتریں تاک کتابجاہ پھریزتگ انت بزاں بلوچی زبان، لبزانک، دود ربیدگ ءُ ایدگہ پڑانی یک بی بہائیں گنج یے اگاں ما بگشیں کہ بلوچ، بلوچیءُ بلوچستانءِ سرحال ءِ بنیادی ماخذ انت گڈا ما دروگ بند نہ بئیں بلے وھدے گوزگ پد ءُ دگہ موسمی حالاتانی سببءُ یک اناگتی ویل بزاں آس ءُ آپ ءِ چہ رکھینگے خاطرا کتابجاہ ءِ دیرگیں واھگ بیتگ کہ اے مڈی پہ دائمی پھریزگ بہ بنتءُ آیوکیں پدریچاں سر کنگ بہ بنت۔ ھنچوش شما وت سرپدے ات کہ اے یک وھد کش ءُ زر کشیں کار بزاں پروجیکٹ یے، ما اے درگتا بازیں ادارہ ءُ ھستومنداں گوں رابطہ کتگ بلے مارا شریں پسو نہ رستگ ءُ آخر ء کتابجاہء وتی کمکء اے کار بنگیج کت۔ اے درگتا کتابجاہ ءُ راج وش بھتی انت کہ اے کار سرجم کنگے خاطرا کتابجاہءِ دوزواھانی ءُ نودربرانی یک گیچنی ٹیم ء وتی کوپگاں زرت ءُ پہ جوانی اے کارے اولی گام سرجم کت ءُ ۶۰درسد تاکبند ڈیجیٹائیز کتگ انت۔ ادا اے گپ دلگوش کرزایت اے کار سرجم کنگ کابینہ ءُ گیچجنی دوزواھاں کتابجاہ ءِ ھرچ کم کنگے خاطرا وتی جندے کمپیوٹر، اسکینر،کیمرا ءُ ایدگہ ایسوریز کہ اے کار ے واستہ لازم بیتگ انت آرتگ انتءُ اے وڑا اے کارے مزنیں بہرے سرجم کت،بلے انگت ھم اے کارے مزنیں بھرے پشت کپیت بزاں دومی ءُ سیمی بھر کہ آ کراپنگ (cropping)ءُ آن لائن کنگ است انت، مارا اے درگتاشمے کمک ءُ دلبڈی لوٹ ایت۔ ما ادا چہ شمارا دگہ دزبندی کنگ لوٹاں کہ ھما تاک کہ مئے کرا نیست انت کہ آیانی تفصیل ما ویب سائٹ ءُ کتابجاہءِ فیس بک تاک داتگ انت مارا بدئیت ئے ما اسکین کنیں شمارا واپس کنین ئے۔

کتابجاہءِ تند جاہ (Web Site)

اے جدیدیں دؤر بزاں بیست ءُ یکمی کرن انفارمیشن ٹیکنالوجی ءِ دؤر گشگ بیت انتءُ انفارمیشن ٹیکنالوجی ءِ ارزش کس ناکارکت نہ کنت، ھمے وڑا کتابجاہء ھم وتی باسکاں گوں ھم گرنچ بئیگ ءُ وتی کارانی بابت معلومداری دئیگ ءِ واستہ یک تند جاہ بزاں ویب سائٹ ئے www.shrlibrary.orgءِ نامء ء ُ بوتکگ۔ ادا اے گپ گیشینگ لوٹ ایت ویب سائٹ کتابجاہءِ یک دیرگیں دوزواھ ءِ وتی ھرچ ءَ زُرتگ ءُ جوڑ کُرتگ۔

    facebook.com/shrlibrary فیس بُک تاک  

کتابجاہ ءِ فیس بُک تاک  ھم جوڑ بیتگ ءُ سئے (۳) ھزار ءَ گیش مردماں اے تاک دوست داشتگ ءُ اے تاک ءَ کتابجاہ ءِ نیمگ ءَ چے شنگ بیتگیں جار ءُ عکساں چار انت ءُ وتی مارشتاں پہ مارا شات کن انت۔

Progress Report 2013 Download PDF Report