پروفیسر صبا دشتیاری ءِ شہادت ءِ چارمی سالروچی دیوان

پروفیسر صبا دشتیاری ءِ شہادت ءِ چارمی سالروچی دیوان

پروفیسر صبادشتیاریءِ چارمی سالروچ ءِ درگتءَ یک دیوانے۳۱مئی ۲۰۱۵م ،یک شمبے ءِ روچءَ ماں کتابجاہءَ برجم دارگ بوت ۔ اے دیوانءِ سے بہر اتنت۔ اولی بہر ءَ پروفیسر صبادشتیاری ءَُ بلوچی زبان ءِ سرا زانتکارءَُ کوّاسانی گشتانک ات انت ۔ اے ردءَ چہ واجہ اکبر غمشاد، اصغرعلی آزگ ،غلام رسول بلوچ ءَ پروفیسر صبادشتیاریءِ زند ءَُ پہ بلوچی زبانءَ آئیءِ ھزمتانی سراجْوانیں وڑے ءَ گشتانک دات ۔ کتابجاہءِ دودءِ پدا کہ ھمک سال بلوچی زبانءِ یک جْوانیں ھزمتکارے ءَ ایوارڈ بیت ۔ اے سال ءَ پہ زبانءَ جْوانیں ھزمتانی مُزّ ءَ واجہ اکبر غمشادءَ ایوارڈ دیگ بوت۔ دیوانءِ دومی بہر پروفیسر صبادشتیای ءِ شعرانی دپتر ’’آگہی ءِ واب‘‘ءِ دیمدرائی ءَُ چندن ساچ ءِ ردءَُ بند داتگیں کتاب ’’حیاتءِ شاگ‘‘ءِ دیمدرائی کنگ بوت ۔ اے ردءَ بانک مریم بلوچ ءَُ چندن ساچءَ گشتانک دات۔ ایشانی پجّیا سندھءِ نامداریں کوّاس ڈاکٹر کلیم اللہ لاشاریءَ وتی حیال ءَُ لیکہ درشان کت انت ۔ اے بہر ءِ گڈسرا کتابجاہءِ کارمستر ڈاکٹر رمضان بامری ءَ مردمانی منّت گپت انت ۔اے بہر ءِ جارچین غلام رسول بلوچ اَت ۔ 
دومی بہر ’’داددیوان‘‘ ات ۔ اے بہر ءَ ھما نودربراں کہ بلوچی بنگیجی ءَُ بلوچی سرٹیفکیٹ کورس سرجم کتگ ءَُ سوبمند بوتگ انت ، آیاں سندءَُ مدرک دیگ بوت انت ءَُ ایشیءِ پجّیا ھما نودرکہ باجاں(Position)اتک انت آیاں مڈل دیگ بوت۔اے بہر ءِ جار چین غلام رسول کلمتی ات۔ 
مراگشءِ سیمی بہر شاعری ءِ دیوان اَت ۔ اے دیوان ءَ بلوچی زبانءِ نامداریں شاعراں بہر زرت۔ اے دیوانءِ جار چین حسن علی حسن اتءَُ خاصیں مہمانانی توکا اکبر غمشاد، احمد اقبال ، اسحاق خاموش ءَُ ظفر کریم اتنت۔ شاعریءِ توکا ھمّل پرویز ، نبیل نور، جبّار غریب، عزیز ارمان ، غلام رسول کلمتی ، چندن ساچ دگہ بازیں نوک باہندیں شاعراں وتی شعر ءَُ غزل ونت انت ۔ اے دیوان داں شپ ءِ نُھءَ وتی آسر ءَ سر بوت.

Sayad Hashmi Reference Kitabjab

Close Menu