You are currently viewing سید ھاشمی ریفرنس کتابجاہ ءِ شش می لس مجلس ءَُ گچین کاری۔
Sayad Hashmi Reference Library new cabinet for the year of 2015 - 16

سید ھاشمی ریفرنس کتابجاہ ءِ شش می لس مجلس ءَُ گچین کاری۔

  • Post category:News

سید ھاشمی ریفرنس کتابجاہءِ شش می لس مجلس ءَُ گچین کاری۔

گچین کاری چیریں ووٹ چِٹ ءِ وسیلہءَ بوتگ انت

سید ھاشمی ریفرنس کتابجاہءِ شش می لس مجلس ءَُ گچین کاری کتابجاہ ءِ کارمستر ءِ پاگواجہی ءَ کتابجاہ کمپلکس ملیر ءَ برجم دارگ بوتگ ۔دیوان سے بُنگپّانی سرءَ ایر کنگ بوتگ ات ۔ کارگشادءِ نگدال ، حسابدار ءِ نگدال ءَُ دستورءِ توکءَ بدلیانی منّینگ۔ دیوانءِ بنگیج چہ پاکیں کلامءِ وانگ ءَ نبیل نورءَ کت۔ کلام پاکءِ تلاوتءَ پد کارگشاد غلام رسول بلوچ ءَ کتابجاہءِ دوسالانی نگدال دیوانءِ دیمءَ پیش کنانءَ گْوشت کہ ما شہید صبادشتیاریءِ دیتگیں وابانی پیلو کنگءَ وتی وس ءَُ واکءَ جہد کتگ ۔مردم وت اندازہ بہ جن انت کہ ما شہید صبادشتیاریءِ واب داں کجام حدّءَ پیلو کتگ انت ۔ مروچی رسانک در ءَُ چاگردیءِ رسانکءِ دؤراِنت مئے جہد ھمیش انت کہ کتابجاہ گوں نوکیں دؤرءَ ھمگْرنچ بہ بیت پرے ھاترءَ ماہ تاک ءَُ تاکبندانی پہریزکاری (ڈجیٹائیزیشن )ءِ پڑءَ کار کنگ ایں تاکہ پہ پٹ پول کاراں گیشتر ارزانی بہ بیت ۔ تاکبندءَُ ماھتاکانی ڈجیٹائیزیشن ءِ اولی گام سرجم کنگ بوتگ اے گْوستگیں پنجاہ شست سالانی چاپ بوتگیں ماھتاکانی اسکن کنگ ءَُ پہریزگ بوتگ انت ءَُ دومی بہرءِ سرءَ کار بنگیج کنگ بوتگ۔ آئیءَ گْوشت کہ ھمک کتابجاہءِ اولی لوٹ ھمیش انت کہ کتابانی درجہ بندی کنگ بہ بیت اے ردءَ کتابجاہءَ داں مزنیں حدّےءَ وتی کار دیمءَ بُرتگ۔ گلیں باسک اے ھبر ءَ شرّیءَ سرپد انت کہ کتابجاہءِ بُنی مول ءَُ مراد انسٹیٹیوٹ آف بلوچیالوجی انت ما وتی وس ءَُ واکءَ وتی مرادانی منزلءِ نیمگءَ جنزان ایں ۔ مروچی مئے وش بہتی ایش انت کہ بازیں ورنا مئے کمک ءَُ ھمراہ انت ۔ اے سالءَ ما لہتیں کتاب چاپ کتگءَُ لہتیں کتاب پہ چاپءَ جریدگ انت۔ آئیءَ گْوشت کہ لہتیں نگیگیانی سببءَ لہتیں دمگاں کورسءِ کار اے سالءَ مہتل بوتگ بلے بازیں دمگاں سرٹیفیکٹ ءَُ بنگیجی کورس ءِ کلاس بوتگ انت۔کراچیءِ دانشجاہ بزاں یونیورسٹیءَ بلوچی کلاسانی بنگیج کنگءَ کتابجاہ ءِ جہد ھوار انت ءَُ ایشیءِ پجّیءَ لیاری دانشجاہءَ ھم بلوچی زبانءِ وانینگءِ جار جتگ کہ کتابجاہءِ سرمجلس ءَُ باسکانی مزنیں سوبمندی انت۔گوں نوکیں دؤرءَ ھمگْرنچیءِ ھاترءَ کتابجاہءَ وتی تندجاہ بزاں ویب سائٹ(www.shrlibrary.org)جوڑ کتگ ۔ مئے جہد ھمیش انت کہ اے تندجاہ ھستیں دؤرءِ لوٹانی پدءَ بہ بیت ءَُ مردم چہ آئیءَ سیتّ ءَُ نف بہ زیر انت۔ اے رِدءَ کتابجاہءِ یک باسکے ءَ ایشیءِ سرجمیں حرچ وتی سرءَ زُرتگءَُ ایشیءِ اڈ کنگ یا جوڑ کنگءَ واجہ اجمل لطیف بلوچ ءُ ’’انسپائر ویب ڈیولپر‘‘ءِ کُمکءِ ھم ما منّت واریں۔کارگشاد ءَ گْوشت کہ ما پیسرءَ ھم جار جتگ ءَُ یک رندے پدءَ گوں کوّاس ءَُ دوزواھاں دزبندی انت کہ آ مئے رہشونی ءَُ ھمراہ داری بہ کن انت۔ 
کارگشادءِ نگدال ءَ پد حسابدارسلمان رحیمءَ سال۲۰۱۴م ءِ نگدال پیش کت کہ چوش انت:سال ۲۰۱۴ءِ رستگیں کل زرّ بیست ءَُ سَے لکّ،بیست ءَُ ھپت ھزار شش سدءَُ چلءَُ پنچ کلدار۔کل حرچ چار لکّ نودءَُ دو ھزار پنچ سد ءَُ پنجاہ ءَُ یک کلدار ۔کل زرّ کہ داں اے وھدءَ کتابجاہءِ گْورءَ پشت کپتگ انت بیست لکّ پنجاہ ءَُ پنچ ھزارھشت سد سی ءَُ شش کلدار۔حسابدارءِ نگدالءَ پد دستورءِ توکءَ بدلی لس مجلس ءِ دیمءَ ایر کنگ بوت انتءَُ جستءَُ پُرس ءَُ ھبرءَُ ترانءَ پد نوکیں بدلیانی سرءَ تپاک کنگ بوت۔ حسابدارءِ نگدال ءَ پد کتابجاہءِ کارمسترڈاکٹر رمضان بامریءَ ءَ آتکگیں مردمانی منّت گپت ءَُ گْوشت کہ بائد بلوچستان سرکار ۲۰۱۵م ءِ سال ءَ بلوچی زبانءِ نامءَ بہ نامینیتءَُ اے ردءَ کانفرنس ءَُ مُچّی برجم بہ داریت تاکہ زبانءِ اڑانی گیش ءَُ گیواربہ بیت ۔ گڈسرءَ کوھنیں سرمجلس پروشگءَُ نوکیں گچین کاری کمیٹی جوڑکنگ بوت کہ آیانی توکءَ عبدالرؤف بلوچ، شرف شادءَُ عارف میروانی ھوار اتنت ۔ گچین کاری چیریں چٹءِ وسیلہ بوت انت گچین کاریءِ آسر چوش انت:
کامستر ڈاکٹر رمضان بامری،کمک کارمستر دومی بانک مریم بلوچ، کارگشاد غلام رسول بلوچ ، کمک کارگشاد خالد بلوچ، کلیت دارسلمان بلوچ، شنگکار بشیر احمد ، راپتہ کار دار غلام رسول کلمتی ءَُ کارگس کاردارظریف بلوچ بے مقابلہ ءَ سوبمند بوت انت۔ 
کمک کارمسترءِ اُگدہ ءَ ایڈوکیٹ جمال ناصر ءَُ فقیر محمد نیامءَ مقابلہ بوت کہ جمال ناصر سوبمند بوت۔ انتظام کار کمیٹیءِ توکءَ چندن ساچ ، بانک شریفہ شمبے، بانک راحیلہ ، سجاد علی ، نوروز حیات ءَُ جہانگیر ھوت سوبمند بوت انت ۔

Sayad Hashmi Reference Library new cabinet for the year of 2015 - 16
Sayad Hashmi Reference Library new cabinet for the year of 2015 – 16