You are currently viewing دیمروی ءُ مالی نگدال سال 2015

دیمروی ءُ مالی نگدال سال 2015

  • Post category:News / Reports

دیمروی نگدال ۲۰۱۵م

گلیں باسکاں!
سید ھاشمی ریفرنس کتابجاہءِ دستور ءُ کاررہبند ءِ رِدء کارگشاد ھمک سال گلءِ کارانی بابتء نگدالءُ احوال جوڑ کنت ءُ سرمجلس ءُ لس مجلس ءِ باسکانی دیما پیش کنت۔ اے درگتء ۲۰۱۵م ءِ نگدال ء شمئے دیما پیش کنگ آں۔ ھنچوش کہ شما سہی ءُ سرپد اِت کہ مروچاں مئے راجءُ دمگانی ءِ جاورال سکّ نگیگ ءُ زندگُٹگیر انت ۔ وہدے یک راجے چوشیں نگیگیانی آماچ بہ بیت گڈا الّم آئیءِ زندءِ کُلّیں تکءُ پہنات سان مند (اثرمند) بنت ۔چوشیں نگیگیں جاورانی تہا دیمروی کنگ یک گرانیں بارے ۔راجی جاور بہ بنت کہ سیاسیءُ دمگی جاور اے کُلّیں جاور اگاں نگیگ بنت گڈا گوں ایشاں ھمگْرنچیں ھمک چیز نگیگیانی آماچ بنت ۔ زانشی ءُ لبزانکی جاور گوں راجءُ دمگاں ھمگْرنچ انت ،راجیءُ دمگی نگیگیں جاورانی سان (اثر)ھر وڑا زانشی ءُ لبزانکی کارانی سرا ھم کپ انت۔ اے ھبر ءِ تہا ھچ شکّ نیست کہ نگیگیں جاوراں زانشی ءُ لبزانکی کارانی سرا ھم وتی سان (اثر)ءِ رنگ پیش داشتگ پمیشکا ما ھم اے ھبرء منّ ایں کہ مئے گام ھم سُست بوتگ انت بلے ما وتی گام نہ داشتگ آں۔کتابجاہءِ اے سال ءِ دیمرویءِ کار جہلا دیگ بوتگ انت۔

لس مجلسءِ دیوان:کتابجاہ مستریں دیوان لس مجلس ءِ دیوان بوتگ کہ یازدہ جنوری ء برجم دارگ بوتگ اتءُ اے دیوانء گْوستگیں دوسالءِ نگدال ءِ پجّیء نوکیں سرمجلس ءِ گچین کاری ھم برجم دارگ بوتگ ات۔کتابجاہ ءِ دِیرو(تاریخ)ء اولی رندا ’’چیرتاک‘‘(سیکریٹ بیلٹ) ءِ وسیلہء گچین کاری برجم دارگ بوتگ انت ۔ اے لس دیوانء بلوچی زبانءِ دوزواہاں ابید کم ءُ گیش یک سدءُ بیست باسکاں بہر زُرتگ ات ءُ نوکیں سرمجلس ءِ گچین کاری سرجم کتگ ات ۔

سوگندی دیوان(اولی بہر):۱۱ جنوری ۲۰۱۵مء سرمجلس ءِ گچین بوتگیں پہ سرمجلس ء گچین بوتگیں اگدہ دارسوگند زورگ بوت۔ کہ کتابجاہءِ باسکانی پجّیا پنچ سدء گیش مردماں بہر زرتگ ۔

دومی بہر:(سازءُ زیملی ءُ زندال) کتابجاہءِ دودانی ردا ھمک سوگندی دیوانءِ پجّیا یک ناں یک مزن نامیں شاعرےءِ نام ء نامینگ بیت ، اے سازءُ زیملی دیوان بلوچی زبانءِ نامداریں شاعر جوانسال بگٹی ءِ نامء نامینگ بوتگ ات ۔ سازءُ زیمل ء پیش واجہ ساجد بزدارءِ نبشتانک کہ جوانسال بگٹی ءِ زندال ات پیش کنگ بوتءُ ایشانی پجّیا زبانانی استمانی روچ ءِ درگتء کوّاس ءُ زانتکاراں وتی نبشتانک دیوانءِ دیما پیش کت انت۔ گڈسرا سازءُ زیملی بہرء نامداریں گشندہاں جوانسال بگٹی ءِ شاعری پہ ساز ءُ زیمل پیش کت۔

سیمی بہر :(ماتی زبانانی روچ) سوگندی دیوانءِ پجّیء ماتی زبانانی روچءِ درگتء ھم یک جتائیں بہرے برجم دارگ بوتگ ات کہ کوّاس ءُ زانتکاراں وتی نبشتانک ونت انت۔

چارمی بہر :(اسٹیج کسمانک) بلوچ ربیدگی روچءِ درگتء دوداءُ بالاچ ءِ نامء یک اسٹیج کسمانکے پیش کنگ بوتگ ۔رندا ھمے اسٹیج کسمانک کراچی آرٹس کونسل ء ھم پیش کنگ بوت۔

سالروچءُ دادیوان:سیمی مزنیں دیوان پروفیسر صبادشتیاریءِ سالروچ ءِ درگتء برجم دارگ بوتگ ۔ دود ءِ ردا اے دیوانء یک مزن نامیں شاعرےء ایوارڈ دیگ بیت ءُ اے سال ء صبادشتیاری ایوارڈ واجہ اکبرگمشاد ء دیگ بوت۔ اے دیوان ء پروفیسر صبادشتیاریءِ زندءِ سرا کوّاساں وتی دُرّیں دانک درشان کت انت ءُ ایشیءِ پجّیا سرٹیفکیٹ ءُ بنگیجی کلاساں ھما نودر بر کہ سوبمندبوتگ ات انت آیانی سند ءُ تمگہ دیگ بوت۔ دیوانءِ سیمی بہر ء مزن نامیں شاعراں وتی پربند ونت انت۔

سرمجلس ءِ نیاد:کتابجاہءِ سر مجلس ء وہد پہ وہد نیاد برجم داشتگ انت۔ سرمجلسء کُلّ یازدہ نیاد برجم داشتگ۔۔سر مجلس ءِ دیوانء دو کتابانی دیمردرائی بوت کہ چریشاں یکے پروفیسر صبادشتیاریءِ شاعریءِ کتاب ’’آگہی ءِ واب‘‘ءُ دومی پروفیسر صبادشتیاریءِ زندءِ سرا چاپ بوتگیں نبشتانکانی کتاب کہ چندن ساچء نزّاتگ ات’’ حیات ءِ شاگ ‘‘ات

روش (کورس):  ۔ کتابجاہ ھمک سال دو روِش(بنگیجی ءُ راسینتکی) برجم داریت۔اے سالء دورءُ دراجیں دمگاں کورس برجم دارگ نہ بوتگ انت البت کراچیء راستینکی تبک برجم دارگ بوتگ انت۔ بنگیجیءِ ۵۴ءُ راستینکیءِ۳نودربراں بہر زرتگ۔دوھزار ھشتء بگرداں ۱۵۔۲۰۱۴مء کُلّ ۲۵۸۱ (دو ھزار پنچ سدءُ ھشتادءُ یک) نودربراں بنگیجیءُ راستینکی روِشاں بہر زرتگ۔

گوں ادارہاں راپتہ: کتابجاہ ءِ مول مرادانی تہا بلوچی زبانءِ سرا کار کنوکیں دگہ ادارہانی گوں راپتہ ءُ ھمگْرنچی ھم ھوار اِنت اے ردا کتابجاہ ءِ کارمستر ڈاکٹر رمضان بامریءُ کتابجاہ پان غلام رسول کلمتی ء بلوچی اکیڈمی کوئٹہ ءِ سنگتاں گوں نند ءُ نیاد کتگ ءُ بلوچی اکیڈمی ءِ یک ڈلّے ء سید ھاشمی ریفرنس کتابجاہءِ ترّءُ تاب ھم کتگ ءُ گپّ ءُ تران ھم کتگ۔

درجہ بندی: کتابجاہ ء ھستیں کتابانی درجہ بندی ءِ کار کہ گْوستگیں سالء بنگیج کنگ بوتگ ات ، اے سال ء نود درسد سرجم کنگ بوتگ ۔

کتاب:اے سال ء کتابجاہ ء۴۹۸کتاب گیش کنگ بوتگ(ماہتاک ءُ تاکبندھوار نہ انت) بلوچی اکیڈمیء وتی چاپ کتگیں کتابانی یک شرّیں کُمکے کتابجاہء داتگ ایشیءِ پجّیا واجہ نثار بادینی ء لہتیں نایاپتیں کتاب چہ گوریچانی بلوچستانء پہ کتابجاہء دست کتگ۔واجہ عبدالواحد کامریڈ ء ھم کتابانی مزنیں کچّے چہ دوست ءُ دوزواہاں زُرتگ ءُ کتابجاہء سرکتگ انت۔دگہ چاپ بوتگیں ءُ جریدگیں کتاب اے وڑا انت۔ واجہ صبادشتیاری ءِ شاعری ءِ کتاب ’’آگہی ءِ واب ‘‘چہ کتابجاہ ءِ نیمگا چاپ کنگ بوتگ ۔دگہ چارکتاب چاپ بوتگ انت ءُ زوت شمئے دیماکاینت کہ ایشانی تہا پروفیسر صبادشتیاریءِ کتاب گلکارءُ چکنکار(دومی برا)،واجہ رحیم مہر ءِ رد ءُ بند داتگیں مُلّا فاضل ءِ زندءُ ازم(دومی برا)، واجہ عاصم زہیرءِ انور شاہ قحطانی ءِ زندءِ سرا ’’گروکی شہم‘‘ءُ واجہ اے آردادءِ رجانک ’’کماراں بہ بئے‘‘ھوار انت ۔ھتورامءِ تاریخ بلوچستان کہ واجہ ڈاکٹر حمید بلوچ ءُ ڈاکٹر رمضان بامریء دوبر آئیءِ سرا کارکتگ، پہ چاپء جریدگ انت۔ ڈکشنری ءِ کار کہ ھشت ماہ پیش سرجم کنگ بوتگ ،پہ دوارچارءُ ھورت وانیء مہتل انت ۔ ایشاں ابید واجہ پروفیسر صبادشتیاریءِ ردءُ بندداتگیں دگہدو کتابانی(ملک محمد پناہ ءِ شونگال کہ آئیءِ دو بہر انت ءُ واجہ صبادشتیاریءِ نمدی) سرا ھم کار برجا ہ انت۔

مواد امباری: تاکبندءُ ماہتاکانی اسکن کنگ ءُ پہریزگءِ کار ءِ اولی بہر کہ گْوستگیں سالء سرجم کنگ بوتگ ات نوں دومی بہر ءِ سرا کار برجاہ انت۔لہتیں گاریں ماہتاک دوبر شوہاز کنگ ءُ اسکن کنگ بوتگ انت ۔ ایشانی PDFء مان گیجگ ءِ کار بندات کنگ بوتگ۔

باسک: ادارہانی تہا باسکانی کم ءُ گیش بوگ نوکیں ھبرے نہ انت یک نیمگے اگاں بازیں باسک راپتہءِ تہا نہ انت بلے دومی نیمگا۔۔۔۔نوکیں باسک جوڑ بوتگ۔

پیش بندی: کتابجاہءِ ماڑی ءِ نوک کاری ءِ کار ۔ کتابانی شونتاک(انڈکس) جوڑ کنگ ۔ ماہتاکانی لڑاں ردءُ بند دیگ ءُ تندجاہء شنگ کنگ۔ شمئے منّتوار کارگشاد۔ سید ھاشمی ریفرنس کتابجاہ

 

مالی نگدال۲۰۱۵م

گلیں باسکاں!
کتابجاہ وتی دودانی رِدا وتی باسکءُ دوزواہانی دیما سال 2015 مءِ در چ ءُ حرچ ءِ حساب ء پیش کنت کہ 2015مءِ حرچ ءُ درچ ءِ حساب چوش انت:
درچ:۔

شستءُ پنچ ھزارچار سد کلدار 65,400/= باسکی بجّاری
بیستءُ ھشت ھزار چار سدءُ دہ کلدار 28,410/= کتاب، فوٹو کاپی، سی ڈیءُ اسٹیکرانی بہاءِ زرّ
پنچ ھزار کلدار 5,000/= بلوچی بنگیجی ءُ سرٹیفیکٹ کورسانی رستگیں زرّ
دہ ھزارءُ پنچ سد کلدار 10,500/= گچین کاری ء بہر زیرگ ءِ زرّ
نوزدہ ہزار پنچ سد کلدار 19,500/= کابینہ ءِ اگدہ دارانی ھمک ماہی خاصیں بجّاری
سیءُ ھپت ھزار یک سد کلدار 37,100/= باسک ءُ دوزواہانی بجّاری
سئے لکّ کلدار 300,000/= جتائیں بجّاری (کتابجاہ ءِ یک دوزواہےءِ)
دہ لکّ کلدار 1,000,000/= جتائیں بجّاری(سروزیر – بلوچستان سرکار

سال2015ءِ  رستگیں کل زرّ ۔۔۔۔۔۔۔۔۔۔۔۔ 1,465,910/= (چاردہ لکّ شست ءُ پنچ ھزار نو سد ءُ دہ )کلدار

حرچ:۔

سئے ھزار چار سد ءُ چِل کلدار 3,440/= ڈاک ءُ پوسٹ ءِ حرچ
چِل ءُ سئے ھزار ھشت سد ءُ نود پنچ کلدار 43,895/= رنگ ءُ روگنءُ نوکاریءُ لین
سیزدہ ھزار ھشت سدءُ ھشتاد دو کلدار 13,882/= کمپیوٹر ءُ فوٹو کاپی مشین ءِ حرچ ءُ درچ
ھپتاد ءُ ھپت ھزار پنچ سد ءُ ھشتاد  کلدار 77,580/= دیوان ءُ مراگش
ھپتاد ءُ پنچ ھزارچارسد کلدار 75,400/= چاپ ءُ کتاب
دو لک چِل ءُ پنچ ھزار کلدار 245,000/= کارمندانی پگار
دو ھزارچار سد ءُ چِل کلدار 2,440/= نویسمان (اسٹشنری)
ھشتاد ھزار نوسد پنجاہ ءُ شش کلدار 80,956/= کارگس ءِ پلگارگ ءُ ھورتہوریں حرچ
یازدہ ھزار ءُ یک کلدار 11001/= بینک سُنگ

کل ۔۔۔۔۔۔۔۔۔۔۔۔۔۔۔۔۔۔۔۔۔ 553,594/= (پنچ لک پنجاہ ءُ سے ھزار پنچ سد ءُ نود ءُ چار)کلدار

سرجمیں حساب چوش انت:۔ کُل درچ ۔۔۔۔۔۔۔۔۔۔۔۔۔۔۔۔۔۔۔۔ 1,465,910 (چاردہ لکّ شست ءُ پنچ ھزار نو سد ءُ دہ )کلدار
کُل حرچ ……………………….. 553,594 (پنچ لک پنجاہ ءُ سے ھزار پنچ سد ءُ نود ءُ چار)کلدار
پشت کپتگیں زرّ یا دستءِ زرّ………….. 912,316 (نو لک دوازدہ ھزارسے سدءُ شانزدہ )کلدار
سال2014ءِ پشت کپتگیں زرّ ۔۔۔۔۔۔۔۔۔ 2,155,836 (بیس ءُ یک لک پنجا ہ ءُ پنچ ھزار ھشت سد سی ءُ شش)کلدار

کل زرّ کہ داں اے وہدء کتابجاہءِ گْوراپشت کپتگ انت 3,068,152 (سی لک شستءُ ھشت ھزاریک سدءُ پنجاہءُ دو)کلدار

دلگوش شہید صبا دشتیاری ءِ اکائونٹ ءَ گْرنچیگیں زرّ (300،177) ادا ھوار نہ انت۔

اے ردا من گوں وتی باسکاں ھمے گشگ لوٹاں کہ گندگ ء ھمے ظاہر بیگ ء انت کہ گوستگیں دو سالانی تہا کتابجاہ ء چہ حکومت بلوچستانءِ نیمگا 30لک کلدار رستگ ۔ بلے من اے گشگ لوٹاں کہ اے کلدار مارا پہ ماڑی ءِ بندگ ء یا جوڑ دیگ ء درکار انت ۔ ھنچوش کہ چہ ایشی ء پیسر مئے کتابجاہ ءِ باسک ءُ ھمبلءُ دوزواہاں مدام وتی دست شات کتگ انت پہ کتابجاہ ءِ کمک ءُ دیمروئیء، من یک رندے پدا وتی کتابجاہ ءِ باسک ءُ ھمبلاں گوں دست بندی کناں کہ وتی دستاں پہ لائبریری ءِ کمک مہ دار انت پر چیا کہ سرکار ءِ زر ادارکی زر انت مارا مدام نہ رس انت کتابجاہ ءِ ھست نیست شما اِت ۔ گوں شمئے دلبڈی ء اے گل پہ زبانءِ لبزانک ءِ دیمروی ء دیمترا جنزان بیت کنت ۔
. شمئے منتوار
حسابدار
Download PDF -> SHRL Report 2015           سید ھاشمی ریفرنس کتابجاہ